ایران جوہری ہتھیاروں کی تیاری کا خواہش مند نہیں، اسماعیل بقائی

تہران (ڈیلی اردو) تہران میں ایرانی وزارت خارجہ نے کہا ہے کہ ایران اپنے لیے کوئی جوہری ہتھیار تیار نہیں کرنا چاہتا، مگر ایٹمی ہتھیاروں کے عدم پھیلاؤ کے معاہدے کی ایرانی رکنیت کا ممکنہ خاتمہ زیر غور ہے۔

ایرانی وزارت خارجہ کے ترجمان اسماعیل بقائی نے پیر 30 مارچ کے روز ہفتہ وار میڈیا بریفنگ میں کہا کہ اسلامی جمہوریہ ایران نے نہ ایسا کبھی کیا ہے اور نہ ہی ابھی تک اس کی ایسی کوئی خواہش ہے کہ اس کے پاس جوہری ہتھیار ہونا چاہییں۔ تاہم اس وقت تہران میں ملکی پارلیمان کے ارکان اس بارے میں جائزہ لے رہے ہیں کہ آیا ایران کو ایٹمی ہتھیاروں کے عدم پھیلاؤ کے بین الاقوامی معاہدے (این پی ٹی) کا آئندہ بھی حصہ رہنا چاہیے یا اس سے نکل جانا چاہیے۔

وزارت خارجہ کے ترجمان بقائی نے کہا، ’’اس این پی ٹی معاہدے کی رکنیت کے حوالے سے، اور اس بات سے بالکل قطع نظر کہ ایران وسیع پیمانے پر انسانی ہلاکتوں کا باعث بن سکنے والے ہتھیاروں پر پابندی کا حامی ہے، اس موضوع پر ایرانی عوام اور ملکی پارلیمان دونوں سطحوں پر واقعی ایک بھرپور بحث جاری ہے کہ آیا ایران کو این پی ٹی میں اپنی رکنیت ختم کر دینا چاہیے۔‘‘