ایران جوہری ہتھیار حاصل نہیں کر سکتا، جے ڈی وینس

واشنگٹن (ڈیلی اردو ) امریکی نائب صدر جے ڈی وینس نے کہا ہے کہ ’ایران کے پاس جوہری ہتھیار نہیں ہو سکتا۔ اگر وہ دوبارہ جوہری ہتھیار بنانے کی کوشش کرتا ہے تو یہ ہمارے لیے ایک مسئلہ ہوگا۔ ہم نے شواہد دیکھے ہیں کہ وہ اسی سمت میں آگے بڑھ رہے ہیں۔‘

انہوں نے مزید کہا کہ صدر ڈونلڈ ٹرمپ سفارتی حل کو ترجیح دیتے ہیں، اسی لیے مذاکرات کار بھیجے گئے ہیں، تاہم امریکا کے پاس دیگر آپشن بھی موجود ہیں۔

ان بیانات کے تناظر میں ایرانی وزیر خارجہ عباس عراقچی ایک سفارتی وفد کی سربراہی میں جنیوا پہنچ گئے ہیں، جہاں وہ مشرق وسطیٰ کے لیے ٹرمپ کے خصوصی نمائندے سٹیو وائٹیکر کے ساتھ مذاکرات کریں گے۔

گزشتہ موسمِ گرما میں 12 روزہ جنگ کے بعد دونوں ممالک کے درمیان بات چیت کا یہ تیسرا دور ہے، جو عمان کی ثالثی میں ہو رہا ہے۔

حالیہ دنوں میں ایرانی حکام نے مذاکرات میں پیش رفت اور امریکا کے ساتھ ممکنہ معاہدے کے حوالے سے امید ظاہر کی ہے۔ دوسری جانب وائٹ ہاؤس حکام نے واضح کیا ہے کہ اگر ایران نے معاہدے کی پاسداری نہ کی تو اسے ’سنگین نتائج‘ کا سامنا کرنا پڑ سکتا ہے۔