ایران: مجتبیٰ خامنہ ای نے 2 ہزار سے زائد قیدیوں کی سزائیں معاف کر دیں

تہران (ڈیلی اردو) ایران کے نئے سپریم لیڈر آیت اللہ مجتبیٰ خامنہ ای نے دو ہزار سے زائد قیدیوں کی سزائیں معاف یا کم کر دی ہیں، یہ اطلاع سرکاری نشریاتی ادارے پریس ٹی وی نے دی ہے۔

رپورٹ کے مطابق ایران کی عدلیہ کے سربراہ غلام حسین محسنی اژئی کی جانب سے رحم کی اپیل منظور کیے جانے کے بعد بیشتر قیدیوں کی فوری رہائی کا امکان ظاہر کیا گیا ہے۔

دیگر رپورٹس کے مطابق سکیورٹی سے متعلق جرائم، بشمول جاسوسی کے الزامات میں قید افراد کو اس معافی میں شامل نہیں کیا گیا۔

یہ اقدام ایسے وقت میں سامنے آیا ہے جب ایران گزشتہ برس دسمبر میں ہونے والے ملک گیر احتجاج کے بعد گرفتار کیے گئے ہزاروں افراد اور معاشی مشکلات کے باعث عالمی توجہ کا مرکز بنا ہوا ہے۔

یاد رہے کہ ایران میں دسمبر کے احتجاج معاشی بحران اور بڑھتے ہوئے عوامی دباؤ کے تناظر میں شروع ہوئے تھے، جبکہ ایرانی حکام کا مؤقف رہا ہے کہ امریکی پابندیوں نے ملکی معیشت پر مزید دباؤ ڈالا ہے۔