ایران کو کسی بھی خطرے کا فوری اور جغرافیائی حدود سے آزاد جواب دیا جائے، مجتبیٰ خامنہ ای کی مسلح افواج کو ہدایت

تہران(ڈیلی اردو) ایران کے رہبرِ اعلیٰ آیت اللہ مجتبیٰ خامنہ ای نے مسلح افواج کے اعلیٰ کمانڈروں کو ہدایت کی ہے کہ ملک کو درپیش کسی بھی نوعیت کے خطرے کا فوری اور مؤثر جواب دینے کے لیے مکمل جنگی تیاری برقرار رکھی جائے اور جوابی کارروائی کو جغرافیائی حدود تک محدود نہ رکھا جائے۔

ایرانی رہبرِ اعلیٰ نے اعلیٰ فوجی حکام سے ملاقات کے دوران خبردار کیا کہ اگر امریکہ یا اسرائیل کی جانب سے دوبارہ فوجی یا مبینہ دہشتگردانہ حملے کیے گئے تو ان کے خاتمے کا وقت اور شرائط ایران کی مسلح افواج اور عوام خود طے کریں گے۔ انہوں نے دفاعی صلاحیتوں، فوجی انٹیلی جنس نظام اور جدید عسکری ٹیکنالوجی کو مزید بہتر بنانے کے ساتھ فوج کو درکار وسائل اور معاونت کی فراہمی جاری رکھنے پر بھی زور دیا۔

عالمی میڈیا کی رپورٹوں کے مطابق مجتبیٰ خامنہ ای نے فوجی کمانڈروں کو ایران کے ممکنہ اہداف کی فہرست پر نظرثانی اور اسے وسعت دینے کی ہدایت بھی کی، تاکہ امریکہ اور اسرائیل سے وابستہ عسکری اور دیگر اثاثے ایرانی افواج کی ممکنہ جوابی کارروائی کی دسترس میں رہیں۔ اجلاس میں ایرانی فوج کے سربراہ میجر جنرل امیر حاتمی، پاسدارانِ انقلاب کے سربراہ میجر جنرل احمد واحدی اور مسلح افواج کے چیف آف اسٹاف میجر جنرل علی عبداللہی بھی شریک تھے۔ کمانڈروں نے خلیج فارس، آبنائے ہرمز، بحیرہ عمان اور ملک کی شمال مغربی و جنوب مشرقی سرحدوں پر دفاعی تیاریوں کے بارے میں بریفنگ دی۔

یہ بیان ایسے وقت میں سامنے آیا ہے جب ایران اور امریکہ کے درمیان دوبارہ فوجی تصادم کے خدشات برقرار ہیں۔ امریکہ اور اسرائیل نے 28 فروری 2026 کو ایران پر حملے کیے تھے، جس کے بعد ایران نے خطے میں جوابی کارروائیاں کیں۔ امریکی نائب صدر جے ڈی وینس کی جانب سے تہران کو خط بھیجے جانے اور قطر کے اعلیٰ سطح کے وفد کی ایرانی حکام سے ملاقاتوں کے ذریعے سفارتی رابطوں کی کوششیں بھی جاری ہیں۔ تاہم تازہ رپورٹس کے مطابق فریقین کے درمیان کشیدگی کم کرنے اور مذاکرات کی بحالی کے لیے کوششوں کے باوجود کسی حتمی معاہدے کا اعلان نہیں کیا گیا۔