ایران نے نیول سربراہ علی رضا تنگسیری کی ہلاکت کی تصدیق کر دی

تہران (ڈیلی اردو) ایران نے پیر 30 مارچ کے روز اس بات کی تصدیق کر دی کہ اس کی پاسداران انقلاب کور کی بحریہ کے سربراہ علی رضا تنگسیری انتقال کر گئے ہیں۔ 

ایرانی بیانات کے مطابق تنگسیری چند روز قبل ایک اسرائیلی فضائی حملے میں شدید زخمی ہو گئے تھے۔

تہران سے ملنے والی نیوز ایجنسی اے ایف پی کی رپورٹوں کے مطابق ایران کی پاسداران انقلاب کور کی نیوز ویب سائٹ ’سپاہ‘ پر جاری کردہ ایک بیان میں کہا گیا کہ علی رضا تنگسیری ایک اسرائیلی فضائی حملے میں شدید زخمی ہو گئے تھے اور وہ زخموں کی تاب نہ لاتے ہوئے انتقال کر گئے۔

قبل ازیں اسرائیلی فوج کی طرف سے 26 مارچ گزشتہ جمعرات کے روز کہا گیا تھا کہ علی رضا تنگسیری کو ہلاک کر دیا گیا تھا، جو ایرانی بحریہ کے ایک ریئر ایڈمرل تھے۔

اسرائیل کی فوج نے ان کی موت کا اعلان کرتے ہوئے ایک بیان میں کہا تھا کہ ایرانی پاسداران انقلاب کے نیول کمانڈر علی رضا تنگسیری اور کئی دیگر سینئر افسران کو ایک فضائی حملے میں ’’اڑا کر ختم کر دیا گیا۔‘‘

پاسداران انقلاب نے آبنائے ہرمز کی ایران کی طرف سے بندش کے عمل میں تنگسیری کے کردار کو سراہتے ہوئے پیر کے روز کہا، ’’ہمارا ہر فائٹر تنگسیری ہے اور ہم دیکھیں گے کہ آنے والے دنوں اور مہینوں میں ایران کس کس طرح کی حیران کن پیش رفت کی وجہ بنتا ہے۔‘‘