ایران نے 20 پاکستانی پرچم والے بحری جہازوں کو آبنائے ہرمز سے گزرنے کی اجازت دیدی

اسلام آباد (ڈیلی اردو) پاکستان کے نائب وزیرِاعظم اور وفاقی وزیرِ خارجہ اسحاق ڈار کے مطابق ایرانی حکومت نے پاکستانی پرچم کے تحت چلنے والے مزید 20 بحری جہازوں کو آبنائے ہرمز سے گزرنے کی اجازت دینے پر اتفاق کیا ہے۔

سنیچر اور اتوار کی درمیانی شب جاری بیان میں وزیرِ خارجہ نے کہا کہ:“مجھے خوشی ہے کہ ایران کی حکومت نے پاکستانی پرچم کے تحت مزید 20 جہازوں کو آبنائے ہرمز سے گزرنے کی اجازت دینے پر اتفاق کیا ہے، جس کے بعد روزانہ دو بحری جہاز اس راستے سے عبور کریں گے۔”

اسحاق ڈار نے کہا کہ یہ ایران کی جانب سے خوش آئند اور قابل ستائش اقدام ہے، جو خطے میں امن اور استحکام لانے میں مدد دے گا۔

انہوں نے مزید کہا:“ یہ مثبت اعلان امن کی جانب ایک بامعنی قدم ہے اور اس سمت میں ہماری مشترکہ کوششوں کو مضبوط بنائے گا۔ مذاکرات، سفارت کاری اور اعتماد سازی کے اقدامات ہی آگے بڑھنے کا واحد راستہ ہیں۔”

یاد رہے کہ گزشتہ روز امریکی صدر ڈونلڈ ٹرمپ نے کابینہ کے اجلاس کے دوران بتایا تھا کہ آبنائے ہرمز سے تیل سے بھرے آٹھ آئل ٹینکرز گزرے، جن پر غالباً پاکستانی پرچم تھا۔ 

صدر ٹرمپ کے مطابق ایران نے ماضی میں دیے گئے ایک بیان پر معذرت بھی کی اور مزید دو آئل ٹینکرز بھیجنے کی اطلاع دی، جس کے بعد مجموعی تعداد 10 ہو گئی۔