ایران پر فضائی حملوں میں اہم کمانڈر سمیت 20 افراد ہلاک، 10 زخمی

تہران (ڈیلی اردو) ایران کے شہر قم پر ہونے والے حملے میں ایک اہم کمانڈر سمیت 20 افراد ہلاک اور 10 زخمی ہو گئے ہیں، مقامی میڈیا اور فارس نیوز ایجنسی و تسنیم کے مطابق یہ حملہ آج صبح پاردیسن علاقے میں ہوا۔ 

ابتدائی اطلاعات میں ہلاکتوں کی تعداد چھ بتائی گئی تھی، جو اب بڑھ کر 20 ہو گئی ہے۔

ایرانی ہلال احمر سوسائٹی کے مطابق امدادی کارکن جائے وقوعہ پر پہنچ گئے ہیں اور یہ ایک رہائشی علاقہ ہے۔

حملوں کے بعد پاسدارانِ انقلاب کے ایرو اسپیس کمانڈر مجید موسوی نے اپنے ایکس اکاؤنٹ پر کہا کہ، "اب معاملہ آنکھ کے بدلے آنکھ کا نہیں رہے گا، انتظار کریں اور دیکھیں۔" انہوں نے مزید کہا کہ امریکہ اور اسرائیل سے منسلک صنعتی کمپنیوں کے ملازمین فوراً اپنے دفاتر سے نکل جائیں۔

موسوی کے اکاؤنٹ میں لکھا گیا: “آپ پہلے بھی ہمیں آزما چکے ہیں۔ دنیا نے دوبارہ دیکھ لیا کہ آپ نے ہی آگ سے کھیلنا شروع کیا اور انفراسٹرکچر کو نشانہ بنایا۔”

اسی دوران ایران کے وزیرِ خارجہ عباس عراقچی نے کہا کہ “ایران اسرائیلی جرائم کی بھاری قیمت وصول کرے گا۔”

ایرانی میڈیا نے مزید رپورٹ کیا کہ مرکزی اصفہان میں واقع مبارکہ سٹیل پلانٹ پر حملہ کیا گیا، جس میں ایک شخص ہلاک اور دو زخمی ہوئے۔

مزید برآں، جنوبی ایران میں خوزستان سٹیل کمپنی کو بھی نشانہ بنایا گیا، جس میں 16 افراد زخمی ہوئے۔