ایران کا امریکا کو نئے حملے پر سخت جواب دینے کا انتباہ، خطے کے دیگر ممالک کو بھی تنبیہ

تہران(ڈیلی اردو) ایران کے مرکزی عسکری کمانڈ خاتم الانبیاء ہیڈ کوارٹر نے دعویٰ کیا ہے کہ امریکا بعض علاقائی ممالک کی رضامندی اور تعاون کے ساتھ ایران کے خلاف دوبارہ فوجی کارروائی کی تیاری کر رہا ہے۔ ایرانی فوجی کمانڈ کے مطابق اسے موصول ہونے والی اطلاعات میں ایک یورپی ملک میں ہونے والے مشترکہ اجلاس کا بھی ذکر ہے، جہاں مبینہ طور پر ایران کے خلاف دوبارہ کارروائی سے متعلق فیصلہ کیا گیا، تاہم بیان میں اجلاس کی میزبانی کرنے والے ملک یا شریک فریقین کے نام ظاہر نہیں کیے گئے۔

ایرانی کمانڈ نے خطے کے ان ممالک کو بھی خبردار کیا ہے جو کسی ممکنہ امریکی کارروائی میں سہولت فراہم کریں گے۔ بیان کے مطابق اگر کوئی ملک ایران کے خلاف امریکی فوجی کارروائی میں براہ راست یا بالواسطہ شریک ہوتا ہے تو تہران اسے اس کارروائی کا فریق تصور کرے گا۔

خاتم الانبیاء ہیڈ کوارٹر نے امریکا کو بھی خبردار کرتے ہوئے کہا کہ ایران پر کسی نئے حملے کی صورت میں مشرق وسطیٰ میں موجود امریکی فوجی اڈوں اور مفادات کو مسلسل اور شدید جوابی کارروائیوں کا نشانہ بنایا جائے گا۔ ایرانی کمانڈ نے اپنے بیان میں کسی ممکنہ حملے کی صورت میں ردعمل کے دائرہ کار پر کسی قسم کی پابندی نہ ہونے کا عندیہ بھی دیا ہے۔

یہ بیان ایسے وقت میں سامنے آیا ہے جب امریکا اور ایران کے درمیان جاری جنگ کے باعث خطے میں کشیدگی برقرار ہے اور امریکی صدر ڈونلڈ ٹرمپ نے بھی حالیہ دنوں میں ایران کے خلاف آئندہ فوجی کارروائی سے متعلق فیصلے کا عندیہ دیا ہے۔

ایرانی حکام اس سے قبل بھی خبردار کر چکے ہیں کہ خطے میں امریکی فوجی کارروائیوں کے لیے اپنی سرزمین، فضائی حدود یا تنصیبات فراہم کرنے والے ممالک ممکنہ جوابی کارروائی کی زد میں آ سکتے ہیں۔