ایران کبھی ایٹمی ہتھیار نہیں بنائے گا، مسعود پژشکیان کا جنرل اسمبلی میں اعلان

نیو یارک (ش ح ط) بدھ کو اقوامِ متحدہ کی جنرل اسمبلی میں خطاب کرتے ہوئے ایرانی صدر مسعود پزشکیان (پژشکیان) نے اسرائیل پر سخت تنقید کی اور کہا کہ ایران میں رواں ماہ ہونے والے اسرائیلی حملے میں ’بچوں اور سائنسدانوں کی ہلاکت‘ اسرائیل کی ’جارحیت‘ کی واضح مثال ہے۔

صدر پژشکیان نے اپنے خطاب میں ایران کے دیرینہ موقف کو دہراتے ہوئے کہا کہ ایران نے کبھی ایٹمی ہتھیار بنانے کی کوشش نہیں کی اور نہ کبھی کرے گا۔ ان کا کہنا تھا: “میں اس اسمبلی کے سامنے ایک بار پھر اعلان کرتا ہوں کہ ایران نے کبھی ایٹمی بم بنانے کی کوشش نہیں کی اور نہ کبھی کرے گا۔”

ایرانی صدر نے اسرائیل کے حالیہ جارحانہ اقدامات کی مذمت کرتے ہوئے کہا کہ سکیورٹی کو طاقت کے استعمال سے یقینی نہیں بنایا جا سکتا بلکہ اس کے لیے اعتماد کی بحالی، علاقائی رابطوں کو بڑھانا اور کثیر الجہتی تعاون ضروری ہے۔ انہوں نے کہا کہ رواں برس جون میں ایران پر کیے گئے حملے سفارتکاری کو سنگین دھوکہ دینے کے مترادف تھے۔

صدر پژشکیان نے سعودی عرب اور پاکستان کے درمیان حالیہ دفاعی معاہدے کو خوش آئند قرار دیتے ہوئے کہا کہ یہ اقدام خطے میں ایک مضبوط سکیورٹی نظام اور مسلم ممالک کے درمیان سیاسی، دفاعی اور سکیورٹی تعاون کی شروعات ہے۔

ایرانی صدر نے اپنی تقریر مکمل کرتے ہوئے کہا کہ ایران عالمی شراکت داروں کے ساتھ کام کرنے اور عالمی تنہائی سے نکلنے کے لیے تیار ہے۔

انہوں نے کہا کہ ’ ایران تمام امن پسند ممالک کے لیے ایک پُرعزم شریک اور ایک قابلِ اعتماد ساتھی ہے، اور یہ ایسی شراکت داری جو وقتی مصلحت پر نہیں بلکہ عزت، اعتماد اور مشترکہ مستقبل پر مبنی ہے۔‘