الخلیل میں اسرائیلی فوج کا بڑا آپریشن، سیکڑوں فلسطینی خاندانوں کو گھر خالی کرنے کا حکم

الخلیل (ڈیلی اردو) اسرائیلی فوج نے مغربی کنارے کے شہر الخلیل میں بڑے پیمانے پر فوجی کارروائی شروع کرتے ہوئے سیکڑوں فلسطینی خاندانوں کو گھروں سے نکلنے کا حکم دے دیا ہے۔ کارروائی کے دوران شہر کے داخلی و خارجی راستے بند کر دیے گئے، متعدد علاقوں میں چھاپے مارے گئے اور فلسطینی املاک کو مسمار کرنے کا سلسلہ بھی شروع کر دیا گیا۔ الخلیل کی بلدیہ نے بے گھر ہونے والے خاندانوں کو پناہ اور امداد فراہم کرنے کے لیے ہنگامی اقدامات شروع کر دیے ہیں۔

اسرائیلی فوج کے مطابق یہ کارروائی جمعہ 23 اکتوبر کو الخلیل کے قریب ایک فائرنگ کے واقعے میں دو اسرائیلی فوجیوں کی ہلاکت کے بعد شروع کی گئی۔ فوج کا کہنا ہے کہ کارروائی کا مرکز وہ علاقہ ہے جہاں سے حملہ آور آئے تھے، اور اس دوران اسلحہ تلاش کرنے، مبینہ مسلح نیٹ ورکس کو ختم کرنے اور مشتبہ افراد سے پوچھ گچھ کے لیے کئی روز تک تلاشی مہم جاری رہے گی۔ کارروائی میں اسرائیلی فوج، داخلی سلامتی کے ادارے شاباک، سرحدی پولیس اور سول انتظامیہ کے اہلکار حصہ لے رہے ہیں۔

اسرائیلی فوج نے بتایا کہ کارروائی سے متاثرہ فلسطینی شہریوں کو علاقے سے نکلنے کے لیے تین مخصوص راستے فراہم کیے گئے ہیں، تاہم انہیں سکیورٹی جانچ پڑتال اور پوچھ گچھ سے گزرنا ہوگا۔ فوج کے مطابق جانچ کے دوران مشتبہ قرار دیے جانے والے افراد کو مزید تفتیش کے لیے حراست میں لیا جا سکتا ہے۔ دوسری جانب فلسطینی ذرائع ابلاغ نے رپورٹ کیا ہے کہ فوجیوں نے الخلیل کے علاقے فرش الہوا اور دیگر مقامات پر شہریوں کو گھروں سے نکلنے کا حکم دیا، جبکہ بعض فلسطینی مکانات کو فوجی سرگرمیوں اور مسماری کی کارروائیوں کے دوران خالی کرایا گیا۔

فلسطینی خبر رساں ادارے وفا کے مطابق اسرائیلی فوج نے الخلیل شہر اور اس کے گردونواح کے قصبوں اور دیہات کے داخلی و خارجی راستے بند کر دیے، متعدد مقامات پر چھاپے مارے اور گھروں کی تلاشی لی۔ فوجی گاڑیوں اور بلڈوزروں کی مدد سے کارروائیاں کی گئیں، جبکہ شہر کے شمالی حصے میں تین رہائشی اپارٹمنٹس پر مشتمل ایک عمارت بھی مسمار کر دی گئی۔ فلسطینی ذرائع کے مطابق عمارت ایک مقامی خاندان کی ملکیت تھی۔ ان پابندیوں کے باعث شہریوں کی آمدورفت شدید متاثر ہوئی۔

الخلیل میں سکیورٹی صورتحال کے پیش نظر تعلیمی اداروں نے ہفتے کے روز تدریسی سرگرمیاں معطل کرنے کا اعلان کیا، جبکہ فلسطینی ٹرانسپورٹ یونین نے شہریوں کی جانوں کو لاحق خطرات کے پیش نظر گاڑیوں کی نقل و حرکت روکنے کی اپیل کی۔ شہر اور آس پاس کے علاقوں میں بندشوں کے باعث مریضوں، طلبہ اور دیگر شہریوں کو نقل و حرکت میں مشکلات کا سامنا ہے۔ اسرائیلی فوج نے مغربی کنارے کے شمالی شہر نابلس کی جانب بھی مزید فوجی کمک بھیجی، جبکہ فلسطینی ذرائع ابلاغ نے شمالی مغربی کنارے کے متعدد قصبوں میں چھاپوں اور درجنوں فلسطینیوں کی گرفتاریوں کی اطلاعات دی ہیں۔

فائرنگ کے واقعے میں دو اسرائیلی فوجی ہلاک

خبر رساں ادارے رائٹرز اور ایسوسی ایٹڈ پریس کے مطابق جمعہ کی صبح الخلیل کے قریب یہودا جنکشن کے مقام پر فائرنگ کے واقعے میں دو اسرائیلی فوجی ہلاک اور تین زخمی ہوئے۔ اسرائیلی فوج نے دعویٰ کیا کہ فائرنگ کرنے والے دونوں فلسطینیوں کو جوابی کارروائی میں ہلاک کر دیا گیا۔ فوج کے مطابق فائرنگ کے تبادلے کا دورانیہ تقریباً 20 منٹ رہا۔ ہلاک ہونے والے اسرائیلی فوجیوں کی شناخت 23 سالہ رون یوناتان رائٹ مین اور 20 سالہ یووال شائی سویلم کے نام سے کی گئی۔

اسرائیلی وزیراعظم بنیامین نیتن یاہو نے واقعے کے بعد الخلیل میں کارروائی کو وسیع کرنے، متاثرہ محلے کے رہائشیوں کو نکالنے، گھروں کی تلاشی لینے اور ان کے بقول مسلح نیٹ ورکس کے ڈھانچے کو تباہ کرنے کا اعلان کیا۔ انہوں نے الخلیل اور قریبی شہر حلحول کا محاصرہ کرنے اور مغربی کنارے میں مزید وسیع فوجی آپریشن کی تیاری کی ہدایت بھی دی۔ اسرائیلی حکام نے بعض عمارتوں کو سکیورٹی خطرہ قرار دیتے ہوئے مسمار کرنے کا جواز پیش کیا ہے۔

دوسری جانب فلسطینی اتھارٹی نے رہائشی علاقوں سے لوگوں کو نکالنے اور املاک کی مسماری پر اعتراض کیا ہے۔ اسرائیلی کارروائیوں کے ناقدین نے ان اقدامات کو اجتماعی سزا قرار دیا ہے، جبکہ اسرائیلی فوج کا مؤقف ہے کہ اس کا مقصد حملے سے متعلق مشتبہ افراد، اسلحے اور مبینہ مسلح ڈھانچے کو تلاش کرنا ہے۔

یہ کارروائی ایسے وقت میں شروع ہوئی ہے جب مغربی کنارے میں اسرائیلی فوجی چھاپوں، نقل و حرکت پر پابندیوں، آبادکاروں کے حملوں اور فلسطینیوں کی بے دخلی سے متعلق خدشات مسلسل بڑھ رہے ہیں۔ تازہ آپریشن کے نتیجے میں الخلیل اور آس پاس کے علاقوں میں شہری زندگی، تعلیم اور آمدورفت مزید متاثر ہونے کا خدشہ ہے۔