ایران کے خلاف کارروائی میں امریکی فوجیوں کی ہلاکتوں کی تعداد چھ ہو گئی

واشنگٹن (نمائندہ ڈیلی ارد) امریکی فوج کی سینٹرل کمانڈ (CENTCOM) نے پیر کے روز اعلان کیا ہے کہ ایران کے خلاف جاری امریکی فوجی آپریشن کے دوران زخمی ہونے والا ایک اور امریکی فوجی دم توڑ گیا ہے، جس کے بعد ہلاک ہونے والے امریکی اہلکاروں کی تعداد بڑھ کر چھ ہو گئی ہے۔

سینٹرل کمانڈ کے بیان کے مطابق مذکورہ اہلکار ایران کی جانب سے کیے گئے ابتدائی جوابی حملوں میں شدید زخمی ہوا تھا اور بعد ازاں زخموں کی تاب نہ لاتے ہوئے ہلاک ہو گیا۔

خبر رساں ادارے اے ایف پی کے مطابق عالمی وقت کے مطابق پیر کو قریب دوپہر تک ایران کے خلاف واشنگٹن کی فوجی کارروائیوں میں ہلاک ہونے والے امریکی فوجیوں کی تعداد چار تھی، تاہم بعد ازاں جاری کی گئی تازہ اپ ڈیٹ میں بتایا گیا کہ مشرقی وقت کے مطابق شام 4 بجے تک یہ تعداد بڑھ کر چھ ہو گئی۔

سینٹرل کمانڈ نے سوشل میڈیا پلیٹ فارم ایکس پر جاری بیان میں مزید کہا کہ امریکی افواج نے ایک ایسے مقام سے دو فوجیوں کی باقیات بھی برآمد کر لی ہیں جو ایران کے ابتدائی حملوں کے دوران نشانہ بنا تھا۔ یہ دونوں اہلکار پہلے لاپتہ قرار دیے گئے تھے۔

بیان میں کہا گیا ہے کہ ایران کے خلاف بڑے پیمانے پر جنگی کارروائیاں تاحال جاری ہیں، تاہم مزید تفصیلات جاری نہیں کی گئیں۔