باجوڑ: تلی ڈیم کے قریب دھماکے میں 2 افراد ہلاک

باجوڑ (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع باجوڑ کی تحصیل سالارزئی میں واقع تلی ڈیم کے قریب ہونے والے ایک دھماکے میں دو افراد ہلاک ہوگئے، جبکہ پولیس نے واقعے کی تحقیقات شروع کر دی ہیں۔

ڈی ایس پی جمال شاہ کے مطابق ابتدائی اطلاعات کے مطابق دھماکے میں دو افراد ہلاک ہوئے۔ واقعے کی اطلاع ملتے ہی ریسکیو 1122، پولیس اور دیگر متعلقہ اداروں کی ٹیمیں جائے وقوع پر پہنچ گئیں اور امدادی کارروائیاں شروع کر دیں۔

ذرائع کے مطابق ہلاک ہونے والوں میں سے ایک شخص کی لاش نکال کر ڈسٹرکٹ ہیڈکوارٹر اسپتال خار منتقل کر دی گئی ہے، جبکہ دوسرے شخص کی تلاش تلی ڈیم کے پانی میں جاری ہے۔ ریسکیو اہلکار ڈیم میں سرچ آپریشن کر رہے ہیں اور لاپتا شخص کی تلاش کے لیے کوششیں تیز کر دی گئی ہیں۔

ابتدائی معلومات کے مطابق ہلاک ہونے والوں کی شناخت سلیمان قاری فقیر، سکنہ تلے، اور غلام سبحان کے ناموں سے ہوئی ہے، تاہم حکام کی جانب سے ان کی شناخت کی باضابطہ تصدیق کا انتظار ہے۔

پولیس کے مطابق ایس ایچ او باچا رحمان کی قیادت میں بھاری نفری نے جائے وقوع کو گھیرے میں لے لیا ہے اور علاقے میں سیکیورٹی سخت کر دی گئی ہے۔ بم ڈسپوزل اور تفتیشی ٹیمیں شواہد اکٹھے کر رہی ہیں تاکہ دھماکے کی نوعیت اور اس کی وجوہات کا تعین کیا جا سکے۔

حکام کا کہنا ہے کہ فی الحال یہ واضح نہیں ہو سکا کہ دھماکا کس نوعیت کا تھا۔ پولیس اور متعلقہ ادارے مختلف پہلوؤں سے تحقیقات جاری رکھے ہوئے ہیں، جبکہ واقعے سے متعلق مزید تفصیلات سامنے آنے کا انتظار ہے۔