باجوڑ میں 2 ماہ کے دوران افغان طالبان کی گولہ باری سے 9 افراد ہلاک

باجوڑ (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع باجوڑ کے سرحدی علاقوں میں افغان طالبان فورسز کی جانب سے سول آبادی پر گولہ باری کے نتیجے میں 9 افراد ہلاک اور متعدد زخمی ہو گئے ہیں۔ 

ڈپٹی کمشنر باجوڑ نے واقعے میں ہلاک اور زخمی ہونے والے شہریوں کی فہرست جاری کر دی ہے۔

تفصیلات کے مطابق مارچ اور اپریل 2026 کے دوران افغانستان کی جانب سے باجوڑ کے مختلف سرحدی علاقوں، خصوصاً ماموند اور سلارزئی میں مارٹر گولے داغے گئے۔ ان حملوں میں رہائشی علاقے براہِ راست متاثر ہوئے۔

ڈپٹی کمشنر کے مطابق ان واقعات میں 9 افراد ہلاک ہوئے جن میں 3 خواتین اور 6 بچے شامل ہیں، جبکہ متعدد افراد زخمی ہوئے جنہیں قریبی طبی مراکز منتقل کیا گیا۔

حکام کا کہنا ہے کہ فہرست کے اجرا کے بعد متاثرین کے بارے میں تفصیلات واضح ہو گئی ہیں اور واقعے کے تمام پہلوؤں کی جانچ پڑتال جاری ہے۔

سیکیورٹی ذرائع کے مطابق پاکستان کی مسلح افواج نے جوابی کارروائی میں صرف افغان طالبان کی فوجی پوسٹوں اور گن پوزیشنز کو نشانہ بنایا، جبکہ کسی بھی سول آبادی کو نقصان نہیں پہنچایا گیا۔

مقامی آبادی نے گولہ باری کے ان واقعات پر شدید غم و غصے کا اظہار کرتے ہوئے معصوم شہریوں کو نشانہ بنانے کی مذمت کی ہے۔

واضح رہے کہ اس سے قبل بھی قبائلی اضلاع خیبر، کرم اور وزیرستان کے سرحدی علاقوں میں اسی نوعیت کے واقعات رپورٹ ہو چکے ہیں، جن میں جانی نقصان سامنے آیا تھا۔