بغداد میں قبائلی جھڑپ، سیکیورٹی اہلکاروں سمیت متعدد ہلاک و زخمی

بغداد(ڈیلی اردو) بغداد کے مشرقی علاقے الرصافہ میں قبائلی نزاع مسلح جھڑپوں میں بدل گیا جس کے نتیجے میں سیکیورٹی فورسز کے افسران سمیت کئی افراد ہلاک اور متعدد زخمی ہوگئے۔ اطلاعات کے مطابق جھڑپوں کے دوران ایک کرنل رینک کے افسر، ایک فوجی اہلکار اور ایک شہری ہلاک ہوگئے جبکہ 10 سے زائد افراد زخمی ہوئے جن میں زیادہ تر سیکیورٹی اہلکار شامل ہیں۔

وزارتِ داخلہ کے بیان کے مطابق جھڑپیں ہفتہ کی شام "السعادة" علاقے میں شروع ہوئیں، جہاں مسلح افراد نے سیکیورٹی فورسز پر حملہ کیا۔ جوابی کارروائی میں دو حملہ آور ہلاک، پانچ زخمی جبکہ چھ افراد کو گرفتار کرلیا گیا۔

واقعے کے بعد علاقے کو مکمل طور پر گھیرے میں لے لیا گیا، بڑے پیمانے پر سرچ آپریشن جاری ہے اور تمام داخلی و خارجی راستے بند کر دیے گئے ہیں۔ وزارتِ داخلہ نے واضح کیا ہے کہ قانون شکن عناصر کے خلاف سخت کارروائی ہوگی اور قبائلی فسادات کو کسی صورت برداشت نہیں کیا جائے گا، جبکہ ملوث تمام افراد کو انصاف کے کٹہرے میں لایا جائے گا تاکہ مستقبل میں کوئی دوبارہ ایسی کارروائی کرنے کی جرات نہ کرے۔