بلوچستان: جعفرآباد، کوئٹہ اور تربت میں دھماکے، ایک شخص ہلاک، 7 زخمی

کوئٹہ (ڈیلی اردو) صوبہ بلوچستان کے صوبائی دارالحکومت کوئٹہ اور ضلع جعفرآباد میں بم دھماکوں کے واقعات پیش آئے ہیں۔ کوئٹہ میں اسپنی روڈ کے قریب دھماکے میں ایک شخص ہلاک جبکہ دو افراد زخمی ہوگئے۔ پولیس نے علاقے کو گھیرے میں لے لیا اور بم ڈسپوزل اسکواڈ جائے وقوعہ پہنچ گیا۔

اسی طرح ضلع جعفرآباد کے علاقے ڈیرہ اللہ یار میں کریکر دھماکہ ہوا ہے، جس کے نتیجے میں 4 افراد زخمی ہوگئے۔

پولیس کے مطابق دھماکا قومی شاہراہ پر ہوٹل کے قریب ہوا۔دھماکے میں زخمی چاروں افراد کو ہسپتال منتقل کردیا ہے۔

دوسری جانب پنجگور میں وشبود کے علاقے سے دو افراد کی لاشیں ملی ہیں۔ پولیس کا کہنا ہے کہ دونوں افراد کو فائرنگ کرکے قتل کیا گیا ہے۔

دریں اثنا تربت شہر میں غلام نبی چوک پر دستی بم کا دھماکہ ہوا جس میں ایک شخص زخمی ہوگیا۔

یاد رہے گزشتہ 24 گھنٹوں میں دہشت گردی کے واقعات نے شدت اختیار کی ہے جس میں متعدد افراد ہلاک اور زخمی ہوئے ہیں۔