بلوچستان: خضدار میں دستی بم حملہ، ایک بچہ ہلاک، 6 زخمی، پنجگور سے سی ٹی ڈی اہلکار کی لاش برآمد

کوئٹہ  (ڈیلی اردو) پاکستان کے شورش زدہ صوبے بلوچستان کے ضلع خضدار کے علاقے وڈھ میں اتوار کی شب ایک گھر پر دستی بم حملے میں ایک بچہ ہلاک اور خواتین و بچوں سمیت چھ افراد زخمی ہو گئے۔ 

پولیس حکام نے واقعے کی تصدیق کرتے ہوئے بتایا کہ جس گھر کو نشانہ بنایا گیا، وہاں دو بھائیوں کا خاندان مقیم تھا۔ دونوں بھائی سندھ کے علاقے کشمور سے تعلق رکھتے ہیں اور وڈھ میں کھیتوں میں مزدوری کرتے ہیں۔

ایس ایچ او عبدالوہاب کے مطابق حملے میں ہلاک ہونے والے بچے کی عمر تقریباً آٹھ برس تھی۔ زخمیوں کو فوری طبی امداد کے لیے ہسپتال منتقل کر دیا گیا جبکہ واقعے کی تحقیقات شروع کر دی گئی ہیں۔

دوسری جانب ضلع پنجگور میں نامعلوم افراد کے ہاتھوں اغوا کے بعد ایک سی ٹی ڈی اہلکار خلیل احمد کی لاش برآمد ہوئی۔

پولیس کے مطابق لاش چکل کلگ کے علاقے سے ملی۔ اہلکار کے لواحقین نے لاش کے ہمراہ ایس ایس پی کے دفتر کے باہر احتجاج کیا، تاہم پولیس حکام سے مذاکرات کے بعد احتجاج ختم کر دیا گیا۔

حکام کا کہنا ہے کہ واقعے کی مکمل تحقیقات کی جا رہی ہیں اور حملہ آوروں کی جلد شناخت اور گرفتاری کے لیے آپریشنز جاری ہیں۔