بلوچستان: دالبندین میں بلوچ لبریشن آرمی کا پولیس تھانے پر حملہ، 10 قیدی فرار

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع چاغی کا ہیڈکوارٹر دالبندین میں بلوچ لبریشن آرمی (بی ایل اے) کے دہشت گردوں نے ہفتے کے روز پولیس تھانے پر حملہ کر دیا اور شہر میں مختلف مقامات پر ناکہ بندی بھی کی۔

سرکاری حکام کے مطابق دہشت گرد شہر میں داخل ہوئے اور تھانہ سٹی کو نشانہ بنایا، تاہم پولیس کی بروقت جوابی کارروائی کے بعد صورتحال کو کنٹرول میں لے لیا گیا۔ حکام کا کہنا ہے کہ حملے میں کسی جانی نقصان کی اطلاع نہیں ملی جبکہ تھانے کو معمولی نقصان پہنچا۔

محکمہ داخلہ بلوچستان کے معاون برائے میڈیا بابر یوسفزئی نے کہا کہ حملہ آوروں نے تھانے سمیت شہر میں تین مختلف مقامات پر ناکے قائم کیے، تاہم ایس ایس پی چاغی کی قیادت میں پولیس کی بھرپور جوابی کارروائی کے بعد دہشت گرد فرار ہوگئے۔

اطلاعات کے مطابق تھانے میں موجود دس سے زائد زیر تفتیش قیدی فرار بھی ہوگئے۔ حملے کی ایک ویڈیو بھی سوشل میڈیا پر گردش کر رہی ہے جس میں تھانے کے گیٹ اور دیواروں پر گولیوں کے نشانات، مین گیٹ پر نقصان اور بعض حصوں کے جلے ہوئے آثار دیکھے جا سکتے ہیں۔

حکام کے مطابق پولیس نے فوری طور پر علاقے میں سرچ اور کلیئرنس آپریشن شروع کر دیا ہے تاکہ حملے میں ملوث عناصر کو گرفتار یا ہلاک کیا جا سکے۔ بابر یوسفزئی نے کہا کہ شہر میں صورتحال مکمل طور پر کنٹرول میں ہے۔

دوسری جانب کالعدم تنظیم بلوچ لبریشن آرمی (بی ایل اے) نے ان حملوں کی ذمہ داری قبول کر لی ہے۔

دالبندین، ضلع چاغی کا ہیڈکوارٹر ہے اور کوئٹہ سے تقریباً ساڑھے تین سو کلومیٹر مغرب میں ایران اور افغانستان کی سرحد کے قریب واقع ہے۔ یہ علاقہ ماضی میں بھی بدامنی کے واقعات سے متاثر رہا ہے۔