بلوچستان: زیارت حملے میں ہلاک پولیس اہلکاروں کی تعداد 27 ہوگئی

کوئٹہ (ڈیلی اردو)  پاکستان کے شورش زدہ صوبہ بلوچستان کے ضلع زیارت میں پولیس چیک پوسٹ پر ہونے والے دہشت گرد حملے میں ہلاک ہونے والے پولیس اہلکاروں کی مجموعی تعداد 27 ہو گئی ہے۔

 پولیس نے تصدیق کی ہے کہ اغوا کیے گئے 17 اہلکاروں کی گولیوں سے چھلنی لاشیں زرغون غر کے علاقے سے برآمد ہوئی ہیں، جبکہ پاکستانی فوج کا کہنا ہے کہ اس واقعے میں مجموعی طور پر 26 دہشت گرد ہلاک کیے گئے۔

پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے بدھ کے روز پریس کانفرنس میں بتایا کہ واقعہ 6 جولائی کو پیش آیا، جب دہشت گردوں نے ضلع زیارت میں ایک پمپنگ اسٹیشن کے قریب بلوچستان پولیس کی چیک پوسٹ پر حملہ کیا۔

انہوں نے کہا کہ مذکورہ چیک پوسٹ پر تعینات اہلکار پانی کی پائپ لائن اور پمپنگ اسٹیشن کی حفاظت پر مامور تھے تاکہ کوئٹہ کے شہریوں کو بلا تعطل پانی کی فراہمی یقینی بنائی جا سکے۔

ڈی جی آئی ایس پی آر کے مطابق دہشت گردوں نے مختلف اطراف سے چیک پوسٹ پر حملہ کیا، جس کا پولیس نے بھرپور جواب دیا۔ ان کے بقول ابتدائی جھڑپ میں 15 دہشت گرد ہلاک ہوئے جبکہ بلوچستان پولیس کے 10 اہلکار، جن میں دو ایس ایچ اوز بھی شامل تھے، ہلاک ہو گئے۔

انہوں نے بتایا کہ حملے کی اطلاع ملتے ہی پاک فوج اور فرنٹیئر کور (ایف سی) کی نفری زیارت روانہ کی گئی، تاہم ان کے پہنچنے سے قبل حملہ آور چیک پوسٹ پر موجود مزید 17 پولیس اہلکاروں کو یرغمال بنا کر اپنے ساتھ لے گئے۔ ان کے مطابق چیک پوسٹ پر تعینات تمام اہلکار مقامی افراد تھے۔

لیفٹیننٹ جنرل احمد شریف چوہدری نے کہا کہ سکیورٹی فورسز نے دہشت گردوں کا تعاقب کرتے ہوئے ان کا گھیرا تنگ کر دیا، تاہم یرغمال پولیس اہلکاروں کی موجودگی کے باعث فضائی کارروائی نہیں کی گئی۔

انہوں نے بتایا کہ جب دہشت گردوں کو محسوس ہوا کہ وہ محاصرے میں آ چکے ہیں تو انہوں نے بدھ، 8 جولائی کو یرغمال بنائے گئے تمام 17 پولیس اہلکاروں کو ہلاک کر دیا۔

پولیس نے بعد ازاں تصدیق کی کہ اغوا کیے گئے تمام 17 اہلکاروں کی لاشیں زرغون غر کے علاقے سے برآمد کر لی گئی ہیں۔ اس کے بعد حملے میں ہلاک ہونے والے پولیس اہلکاروں کی مجموعی تعداد 27 ہو گئی۔

ڈی جی آئی ایس پی آر کے مطابق زیارت آپریشن کے دوران مجموعی طور پر 26 دہشت گرد ہلاک کیے گئے۔

دوسری جانب کالعدم تحریک طالبان پاکستان (ٹی ٹی پی) نے دعویٰ کیا ہے کہ حملے کے دوران اس نے پولیس کی ایک گاڑی اور درجنوں سرکاری ہتھیار قبضے میں لے لیے۔