بلوچستان: سبی میں پولیس چوکی پر دستی بم حملہ

کوئٹہ (ڈیلی اردو) صوبہ بلوچستان کے ضلع سبی میں ٹریفک پولیس بوتھ پر نامعلوم افراد نے دستی بم حملہ کیا۔

پولیس کے مطابق دستی بم حملے میں کوئی جانی نقصان نہیں ہوا۔

پولیس نے مزید بتایا کہ موٹرسائیکل سوار پولیس بوتھ پر بم پھینک کر فرار ہو گئے، دستی بم دھماکے سے پھٹ گیا، کوئی جانی نقصان کی اطلاع نہیں ملی۔

پولیس کا کہنا تھاکہ بم دھماکے سے پولیس بوتھ کو جزوی نقصان پہنچا، پولیس نے علاقے کو گھیرے میں لے لیا۔

دوسری جانب ضلع کیچ کے علاقے بلیدہ میں بھی پیپلز پارٹی کے امیدوار ظہور بلیدی کے گھر پردستی بم حملہ کیا گیا۔

ڈپٹی کمشنر حسین جان کے مطابق دستی بم ظہور بلیدی کےگھر کے اندر گر کر پھٹ گیا تاہم کوئی جانی نقصان نہیں ہوا۔

واضح رہے کہ گزشتہ روز سبی میں جناح روڈ پر پاکستان تحریک انصاف (پی ٹی آئی) کی ریلی کے قریب دھماکا ہوا تھا، جس کے نتیجے میں 4 افراد ہلاک اور پانچ زخمی ہو گئے تھے۔

دوسری جانب، الیکشن کمیشن آف پاکستان نے بلوچستان کے ضلع سبی میں تحریک انصاف کی ریلی میں دھماکے کا نوٹس لے لیا تھا۔

نگران وزیر اطلاعات جان اچکزئی نے واقعے کو افسوسناک قرار دیتے ہوئے کہا تھا کہ دھماکے کی نوعیت کا معلوم نہیں ہوسکا اور سبی سمیت بلوچستان کے ہسپتالوں میں ایمرجنسی نافذ کردی گئی ہے۔