بلوچستان: سیکیورٹی فورسز کا کچھی میں آپریشن، 4 دہشت گرد ہلاک، 2 اہلکار ہلاک، 3 زخمی

کوئٹہ (نمائندہ ڈیلی اردو) پاکستان کے شورش زدہ صوبہ بلوچستان کے ضلع کچھی کے علاقے کولپور میں سیکیورٹی فورسز نے انٹیلی جنس پر مبنی کارروائی کے دوران 4 دہشت گرد ہلاک کر دیے، جبکہ شدید فائرنگ کے تبادلے میں 2 سیکیورٹی اہلکار ہلاک اور 3 زخمی ہوگئے۔

سیکیورٹی ذرائع کے مطابق کارروائی خفیہ اطلاعات کی بنیاد پر کی گئی، جن میں بتایا گیا تھا کہ دہشت گرد پہاڑی علاقے سپلنجی میں موجود ہیں۔ اطلاع ملنے پر سیکیورٹی فورسز نے علاقے کا محاصرہ کرکے کلیئرنس آپریشن شروع کیا۔

ذرائع کے مطابق جیسے ہی فورسز نے مشتبہ ٹھکانے کی جانب پیش قدمی کی، دہشت گردوں نے فائرنگ شروع کر دی، جس کے بعد دونوں جانب شدید جھڑپ ہوئی۔ کارروائی کے دوران سیکیورٹی فورسز نے 4 دہشت گردوں کو ہلاک کر دیا اور ان کا ٹھکانہ بھی تباہ کر دیا۔

سیکیورٹی ذرائع کا کہنا ہے کہ ہلاک ہونے والے دہشت گردوں کا تعلق کالعدم بلوچ لبریشن آرمی (بی ایل اے) سے تھا۔

جھڑپ کے دوران 2 سیکیورٹی اہلکار ہلاک ہوگئے، جبکہ 3 اہلکار زخمی ہوئے جنہیں طبی امداد کے لیے اسپتال منتقل کر دیا گیا۔

کارروائی کے بعد علاقے میں مزید نفری تعینات کر دی گئی ہے اور فرار ہونے والے دہشت گردوں کی تلاش کے لیے سرچ اور سینیٹائزیشن آپریشن جاری ہے۔

سیکیورٹی ذرائع کے مطابق یہ کارروائی ملک بھر میں جاری انسدادِ دہشت گردی مہم کا حصہ ہے، جس کا مقصد بلوچستان اور دیگر حساس علاقوں میں دہشت گرد تنظیموں کے محفوظ ٹھکانوں کا خاتمہ کرنا ہے۔

ذرائع نے کہا کہ دہشت گردی کے مکمل خاتمے تک انٹیلی جنس پر مبنی کارروائیاں اور سرچ آپریشن بلا تعطل جاری رہیں گے۔ ان کے مطابق سیکیورٹی فورسز دور دراز علاقوں میں دوبارہ منظم ہونے کی کوشش کرنے والے دہشت گرد نیٹ ورکس کے خلاف کارروائیاں جاری رکھے ہوئے ہیں تاکہ ملک میں امن و استحکام کو یقینی بنایا جا سکے۔