بلوچستان: سیکیورٹی فورسز کی کارروائیوں اور حملوں میں 8 حملہ آور ہلاک، 2 اہلکار ہلاک

کوئٹہ (ڈیلی اردو رپورٹ) پاکستان کے شورش زدہ صوبے بلوچستان کے مختلف اضلاع میں جمعہ کے روز سکیورٹی فورسز اور عسکریت پسندوں کے درمیان جھڑپوں اور حملوں کے نتیجے میں کم از کم آٹھ افراد ہلاک ہوگئے، جن میں چار شدت پسند، دو سکیورٹی اہلکار اور کالعدم تنظیم کے دو عسکریت پسند شامل ہیں۔

سکیورٹی ذرائع کے مطابق ضلع خضدار کی تحصیل زہری میں حساس اطلاعات کی بنیاد پر سکیورٹی فورسز نے کارروائی کی۔ کارروائی کے دوران عسکریت پسندوں نے فائرنگ کی کوشش کی تاہم فورسز کی جوابی کارروائی میں کالعدم بلوچ لبریشن آرمی (بی ایل اے) کے کم از کم چار شدت پسند مارے گئے جبکہ کئی فرار ہونے میں کامیاب ہوگئے۔ جائے وقوعہ سے بھاری مقدار میں اسلحہ اور گولہ بارود برآمد کرلیا گیا۔

اسی روز مکران ڈویژن کے سرحدی علاقے مند (گیاب) میں ایف سی اور لیویز اہلکار معمول کی گشت پر تھے کہ شدت پسندوں نے گھات لگا کر فائرنگ کردی۔ حملے میں ایف سی کے دو جوان سپاہی جمیل اور سپاہی عزیز ہلاک ہوگئے۔ حملہ آور فائرنگ کے بعد پہاڑوں کی طرف فرار ہوگئے جبکہ سکیورٹی فورسز نے علاقے میں سرچ آپریشن شروع کردیا۔ 

دونوں اہلکاروں کی میتیں بعد ازاں فوجی اعزاز کے ساتھ آبائی علاقوں کو روانہ کردی گئیں۔

ادھر ضلع قلات کے علاقے دشت کلان امیری نچر میں نامعلوم افراد نے فائرنگ کرکے بی ایل اے کے دو عسکریت پسند سراج احمد اور محمد اسحاق کو ہلاک کردیا۔ 

سکیورٹی حکام کا کہنا ہے کہ بلوچستان میں کالعدم تنظیموں کے خلاف کارروائیاں جاری رہیں گی اور کسی بھی صورت میں امن خراب کرنے والوں کو برداشت نہیں کیا جائے گا۔