بلوچستان: قلات سے اغوا ہونے والے اے ایس ایف ڈپٹی ڈائریکٹر کی تشدد زدہ لاش برآمد

کوئٹہ (ڈیلی اردو) پاکستان کے صوبہ بلوچستان کے ضلع قلات سے اغوا کیے گئے ایئرپورٹ سکیورٹی فورس (اے ایس ایف) کے ڈپٹی ڈائریکٹر محمد وسیم کی تشدد زدہ لاش برآمد ہوئی ہے۔ پولیس حکام نے لاش کی برآمدگی کی تصدیق کر دی ہے۔

قلات پولیس کے سربراہ زاہد شاہ کے مطابق محمد وسیم کی لاش کوئٹہ-کراچی شاہراہ کے قریب ایک ویران علاقے سے ملی۔ انہوں نے بتایا کہ پوسٹ مارٹم اور دیگر قانونی کارروائی مکمل کرنے کے بعد لاش گزشتہ روز کراچی روانہ کر دی گئی۔

محمد وسیم کو 20 مئی کو ضلع قلات کے علاقے محمد تاوہ سے اس وقت اغوا کیا گیا تھا جب وہ ایک نجی گاڑی میں کوئٹہ سے کراچی جا رہے تھے۔ وہ بلوچستان کے سرحدی ضلع ژوب میں واقع ایئرپورٹ پر بطور ڈپٹی ڈائریکٹر اے ایس ایف فرائض انجام دے رہے تھے۔

اغوا کے بعد کالعدم بلوچ لبریشن آرمی (بی ایل اے) نے محمد وسیم کے اغوا کی ذمہ داری قبول کی تھی۔

پولیس کے مطابق لاش پر تشدد کے نشانات پائے گئے ہیں، جبکہ واقعے کی مزید تحقیقات جاری ہیں۔

واضح رہے کہ ضلع قلات بلوچستان کے شورش زدہ علاقوں میں شمار ہوتا ہے، جہاں ماضی میں بھی سکیورٹی فورسز، سرکاری اہلکاروں اور مسافروں کو نشانہ بنانے کے متعدد واقعات پیش آ چکے ہیں۔