بلوچستان: قلات میں سکیورٹی کا آپریشن، بی ایل اے کے 4 شدت پسند ہلاک

راولپنڈی (ک م) پاکستان کے شورش زدہ صوبے بلوچستان میں سیکورٹی فورسز کے آپریشن میں کالعدم بلوچ لبریشن آرمی کے چار شدت پسند ہلاک ہوگئے۔

پاکستانی فوج کے ترجمان ادارے آئی ایس پی آر نے اپنے بیان میں کہا ہے کہ سکیورٹی فورسز نے بلوچستان کے ضلع قلات میں ایک خفیہ اطلاع پر آپریشن کرکے چار شدت پسندوں کو ہلاک کر دیا ہے۔

آئی ایس پی آر کے بیان کے مطابق ’خفیہ اطلاعات پر مبنی اس آپریشن میں ’انڈین پراکسی‘ کے دہشت گردوں کی موجودگی کی اطلاع تھی۔ آپریشن کے دوران فورسز نے دہشت گردوں کے ٹھکانے کو مؤثر انداز میں نشانہ بنایا اور چار انڈین حمایت یافتہ شدت پسند ہلاک کر دیے ہیں۔‘

آئی ایس پی آر کے مطابق ’ یہ شدت پسند علاقے میں متعدد دہشت گردانہ سرگرمیوں میں ملوث رہے تھے اور ان سے اسلحہ، گولہ بارود اور دھماکہ خیز مواد بھی برآمد ہوا۔‘

بیان کے مطابق ’علاقے میں مزید انڈین سرپرست دہشت گردوں کو ختم کرنے کے لیے کلیئرنس آپریشن جاری ہے۔‘

بیان میں دعویٰ کیا گیا ہے کہ ’سکیورٹی فورسز اور پاکستان کی قانون نافذ کرنے والی ایجنسیاں انسدادِ دہشت گردی کی مہم جاری رکھیں گی تاکہ ملک سے غیر ملکی سرپرستی اور حمایت یافتہ دہشت گردی کے خطرے کو جڑ سے ختم کیا جا سکے۔‘

پاکستان میں سرگرم بلوچ عسکریت پسند گروہوں کے لیے پاکستان بھارتی سرپرستی یافتہ پراکسی گروپ کا لفظ استعمال کرتا ہے اور انہیں فتنہ الہندستان کے نام سے جانا جاتا ہے، تاکہ بھارت کے مبینہ کردار اور سرپرستی کو اجاگر کیا جا سکے۔