بلوچستان: قلات میں سیکیورٹی فورسز کا آپریشن، 6 دہشت گرد ہلاک

راولپنڈی (ک م) سیکیورٹی فورسز نے بلوچستان کے ضلع قلات میں دہشت گردوں کی موجودگی کی اطلاع پر انٹیلی جنس بیسڈ آپریشن کرتے ہوئے 6 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق فورسز نے دہشت گردوں کے ٹھکانوں کو موثر انداز میں نشانہ بنایا، جس کے نتیجے میں شدید فائرنگ کے تبادلے کے بعد 6 دہشت گرد مارے گئے۔

ترجمان کے مطابق ہلاک دہشت گرد قانون نافذ کرنے والے اداروں اور معصوم شہریوں کے خلاف حالیہ دہشت گرد کارروائیوں میں ملوث تھے۔ علاقے میں دیگر دہشت گردوں کے خاتمے کے لیے سینیٹائزیشن آپریشن جاری ہے۔

ادھر بلوچستان کے ساحلی شہر گوادر کے علاقے پدی زر میں سیکیورٹی فورسز کی گاڑی کے قریب دھماکے کے نتیجے میں ایک اہلکار ہلاک اور متعدد زخمی ہو گئے ہیں۔

صدر، وزیراعظم اور وزیر اعلیٰ بلوچستان کا خراج تحسین

صدر مملکت آصف علی زرداری نے سیکیورٹی فورسز کو خراج تحسین پیش کرتے ہوئے کہا کہ دہشت گردوں کے مکمل خاتمے تک کارروائیاں جاری رہیں گی، جبکہ وزیراعظم شہباز شریف نے فورسز کی پیشہ ورانہ مہارت کو سراہتے ہوئے کہا کہ قوم اپنے بہادر جوانوں کے شانہ بشانہ کھڑی ہے۔

وزیر اعلیٰ بلوچستان سرفراز بگٹی نے بھی بروقت کارروائی کو سراہتے ہوئے کہا کہ دہشت گردوں کے خلاف جنگ جاری رہے گی اور عوام اور سیکیورٹی فورسز ملک دشمن عناصر کی سازشیں ناکام بنائیں گے۔