بلوچستان: قلعہ عبداللہ میں لیویز اہلکار ہلاک، ٹی ٹی پی نے حملے کی ذمہ داری قبول کرلی

کوئٹہ (بیورو رپورٹ) ‏صوبہ بلوچستان کے ضلع قلعہ عبداللہ میں مسے زئی آڈہ کے قریب نامعلوم موٹر سائیکل سواروں کی فائرنگ سے لیویز فورس کا اہلکار ہلاک ہوگیا۔

ڈپٹی کمشنر جہانزیب شیخ نے ڈیلی اردو کو بتایا کہ لیویز اہلکار ڈیوٹی سے گھر جارہا تھا کہ راستے میں دہشت گردوں نے اس کے سر پر گولیاں ماریں جس سے وہ موقع پر دم توڑ گیا۔

ڈپٹی کمشنر کے مطابق لیویز اہلکار کا نام نور الحق ولد ملک خیر محمد مسیزئی ہے۔ اسے گھر کے قریب ہی نامعلوم موٹرسائیکل سواروں نے نشانہ بنایا۔

لیویز اور پولیس نے علاقے کی ناکہ بندی کر کے تلاش شروع کر دی۔

واضح رہے کہ لیویز اہلکار کو دو روز قبل ٹارگٹ کلنگ کا نشانہ بنایا گیا تھا۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔