کیچ کے علاقے بلنگور میں سکیورٹی فورسز کی کارروائی، فائرنگ کے تبادلے میں 2 مبینہ دہشتگرد ہلاک، ایک اہلکار زخمی

کیچ (ڈیلی اردو) پاکستان کے صوبہ بلوچستان کے ضلع کیچ کے علاقے بلنگور کے مقام دشت میں سکیورٹی فورسز کی کارروائی کے دوران فائرنگ کے تبادلے میں دو مبینہ دہشتگرد ہلاک اور ایک سکیورٹی اہلکار زخمی ہوگیا۔

مقامی ذرائع کے مطابق سکیورٹی فورسز نے دشت کے علاقے بلنگور میں کارروائی کی، جہاں مبینہ طور پر دہشتگردوں کی موجودگی کی اطلاع تھی۔ کارروائی کے دوران فائرنگ کا تبادلہ ہوا، جس کے نتیجے میں دو افراد ہلاک جبکہ ایک سکیورٹی اہلکار زخمی ہوگیا۔ زخمی اہلکار کو طبی امداد کے لیے اسپتال منتقل کردیا گیا۔

ذرائع کے مطابق ہلاک ہونے والے افراد کی لاشیں شناخت اور قانونی کارروائی کے لیے تربت اسپتال منتقل کی گئیں۔ ان میں سے ایک کی شناخت رحیم بخش کے نام سے ہوئی ہے، جو تربت کے علاقے ناصرآباد کا رہائشی بتایا جاتا ہے، جبکہ دوسرے شخص کی شناخت تاحال سامنے نہیں آسکی۔

واقعے کے بعد علاقے میں سکیورٹی مزید سخت کردی گئی ہے۔ تاہم کارروائی کے دوران برآمد ہونے والے اسلحے، ہلاک افراد کی مبینہ تنظیمی وابستگی اور آپریشن کے مزید نتائج سے متعلق تفصیلات تاحال سامنے نہیں آئیں۔

واضح رہے کہ ضلع کیچ میں حالیہ عرصے کے دوران سکیورٹی فورسز کی انسدادِ دہشتگردی کارروائیاں جاری رہی ہیں۔ 29 اکتوبر کو بھی کیچ کے علاقے مناز میں ایک انٹیلی جنس بنیاد پر کارروائی کے دوران ایک مشتبہ دہشتگرد ہلاک اور اسلحہ و گولہ بارود برآمد کرنے کی اطلاع دی گئی تھی۔