عراق کے خورمور گیس فیلڈ پر ڈرون حملہ، پیداوار معطل، بجلی کی فراہمی میں 2 ہزار 800 میگاواٹ تک کمی

سلیمانیہ (ڈیلی اردو) عراق کے نیم خودمختار کردستان خطے میں واقع اہم خورمور گیس فیلڈ پر مشتبہ ڈرون حملے کے نتیجے میں گیس ذخیرہ کرنے کی تنصیب میں آگ بھڑک اٹھی، جس کے بعد گیس کی پیداوار عارضی طور پر معطل کردی گئی۔ واقعے کے باعث بجلی گھروں کو گیس کی فراہمی رکنے سے خطے میں بجلی کی پیداوار 2 ہزار 500 سے 2 ہزار 800 میگاواٹ تک متاثر ہوئی، جبکہ متعدد علاقوں میں بجلی کی بندش اور گیس کی قلت کی اطلاعات سامنے آئی ہیں۔

حکام کے مطابق حملہ اتوار 8 نومبر کی رات صوبہ سلیمانیہ کے ضلع چمچمال میں واقع خورمور گیس فیلڈ پر کیا گیا۔ ابتدائی اطلاعات میں بتایا گیا کہ ایک دھماکا خیز ڈرون نے گیس ذخیرہ کرنے والے حصے کو نشانہ بنایا، جس کے نتیجے میں شدید آگ لگ گئی۔ واقعے کے بعد تنصیب میں کام کرنے والے ملازمین کو محفوظ مقامات پر منتقل کردیا گیا۔

گیس فیلڈ چلانے والی متحدہ عرب امارات کی کمپنی دانہ گیس نے پیر کو تصدیق کی کہ تنصیب پر مشتبہ ڈرون حملے کے باعث آگ لگی تھی، جسے بجھا دیا گیا ہے۔ کمپنی کے مطابق واقعے میں عملے کا کوئی فرد زخمی نہیں ہوا، تاہم نقصان کا جائزہ لینے تک گیس کی پیداوار معطل رہے گی۔ کمپنی نے کہا ہے کہ وہ کردستان کی علاقائی حکومت اور عراق کی وفاقی انتظامیہ کے ساتھ رابطے میں ہے۔

عالمی خبر رساں ادارے رائٹرز کے مطابق خورمور گیس فیلڈ کردستان خطے میں بجلی پیدا کرنے کے لیے گیس کا ایک بڑا ذریعہ ہے۔ حملے کے بعد گیس کی فراہمی بند ہونے سے تقریباً 2 ہزار 800 میگاواٹ بجلی کی پیداواری صلاحیت متاثر ہوئی۔ حکام نے بجلی کی قلت کم کرنے کے لیے متبادل ذرائع استعمال کرنے اور ہسپتالوں سمیت اہم تنصیبات کو ترجیحی بنیادوں پر بجلی فراہم کرنے کے اقدامات شروع کیے ہیں۔

الجزیرہ کی رپورٹ کے مطابق حملے کے باعث کردستان خطے کی 70 فیصد سے زیادہ آبادی بجلی کی بندش سے متاثر ہوئی۔ علاقائی وزارتِ بجلی کے ترجمان نے بتایا کہ اربیل، سلیمانیہ، دهوک، بازیان اور چمچمال میں بجلی گھروں کو گیس کی فراہمی متاثر ہوئی۔ حکام نے ڈوکان اور دربندیخان ڈیموں کے پن بجلی گھروں اور متبادل ایندھن سے چلنے والے بجلی گھروں کو استعمال کرنے کا فیصلہ بھی کیا تاکہ ہسپتالوں اور پانی صاف کرنے کے مراکز کو بجلی کی فراہمی جاری رکھی جا سکے۔

عراق کے وزیراعظم علی الزیدی نے حملے کی تحقیقات کے لیے وفاقی اور کردستان کی علاقائی حکومت کے متعلقہ اداروں پر مشتمل مشترکہ تحقیقاتی کمیٹی قائم کرنے کی ہدایت کی ہے۔ ابتدائی اطلاعات کے مطابق حملے میں کوئی جانی نقصان نہیں ہوا، جبکہ سکیورٹی ادارے واقعے کے محرکات اور حملے میں استعمال ہونے والے ڈرون کی نوعیت کا تعین کر رہے ہیں۔

حملے کی ذمہ داری تاحال کسی گروہ نے قبول نہیں کی اور نہ ہی ایرانی حکومت یا پاسدارانِ انقلاب کی جانب سے اس کارروائی میں ملوث ہونے کی تصدیق سامنے آئی ہے۔ رائٹرز کے مطابق ابتدائی تحقیقات میں ڈرون کے ممکنہ مقامِ پرواز کے حوالے سے کرکوک کے جنوب میں واقع طوزخورماتو کے مشرقی علاقوں کا ذکر سامنے آیا ہے، جبکہ ایرانی سرزمین سے ڈرون داغے جانے کے امکان کو فی الحال مسترد کیے جانے کی اطلاعات ہیں۔ اس لیے حملے کو براہِ راست ایران سے منسوب کرنا قبل از وقت ہوگا۔

خورمور گیس فیلڈ ماضی میں بھی متعدد مرتبہ ڈرون حملوں اور سکیورٹی خطرات کا سامنا کرچکا ہے۔ کردستان کے حکام نے گزشتہ حملوں کا الزام ایران نواز مسلح گروہوں پر عائد کیا تھا، تاہم حالیہ واقعے میں کسی گروہ کے ملوث ہونے کے شواہد ابھی سامنے نہیں آئے۔ توانائی کی اس اہم تنصیب پر حملے نے ایک بار پھر عراق کے توانائی کے بنیادی ڈھانچے کو درپیش سکیورٹی خطرات اور خطے میں جاری کشیدگی کے اثرات کو نمایاں کردیا ہے۔