بلوچستان: مستونگ میں داعش کے ٹارگٹڈ حملے میں دو مسیحی کھلاڑی ہلاک

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع مستونگ میں نامعلوم مسلح افراد کی فائرنگ کے نتیجے میں مسیحی برادری سے تعلق رکھنے والے کرکٹ کے دو کھلاڑی ہلاک ہو گئے، جبکہ شدت پسند تنظیم داعش خراسان (اسلامک اسٹیٹ پاکستان پروونس) نے حملے کی ذمہ داری قبول کرنے کا دعویٰ کیا ہے۔

مقامی انتظامی ذرائع کے مطابق واقعہ مستونگ شہر کے علاقے شمس آباد کراس کے قریب واقع کرکٹ گراؤنڈ میں پیش آیا، جہاں ایک میچ جاری تھا۔

ذرائع نے بتایا کہ نامعلوم موٹر سائیکل سوار مسلح افراد نے گراؤنڈ میں داخل ہو کر فائرنگ کی، جس کے نتیجے میں مسیحی برادری سے تعلق رکھنے والے دو کھلاڑی موقع پر ہلاک ہو گئے۔

بلوچستان کے محکمہ داخلہ و قبائلی امور کے معاون برائے میڈیا بابر یوسفزئی نے واقعے کی مذمت کرتے ہوئے متاثرہ خاندانوں سے اظہار ہمدردی کیا ہے۔

انہوں نے میڈیا سے گفتگو کرتے ہوئے کہا کہ حملہ آور دو موٹر سائیکلوں پر سوار تھے، جنہوں نے کرکٹ کھیلنے والے دو افراد کو نشانہ بنایا۔ ان کا کہنا تھا کہ حکومت ملزمان کو گرفتار کر کے قانون کے مطابق سخت سزا دینے کے لیے تمام وسائل بروئے کار لائے گی۔

مستونگ انتظامیہ کے ایک اہلکار نے نام ظاہر نہ کرنے کی شرط پر بتایا کہ واقعہ کوئٹہ سے تقریباً 50 کلومیٹر جنوب مغرب میں واقع مستونگ شہر میں پیش آیا۔

دوسری جانب شدت پسند تنظیم اسلامک اسٹیٹ (داعش ) نے ایک بیان میں شمس آباد کراس کے قریب کرکٹ گراؤنڈ میں مسیحی برادری سے تعلق رکھنے والے دو کھلاڑیوں کے ہلاکت کی ذمہ داری قبول کرنے کا دعویٰ کیا ہے۔

حکام کے مطابق واقعے کی تحقیقات جاری ہیں، جبکہ حملہ آوروں کی گرفتاری کے لیے کارروائیاں شروع کر دی گئی ہیں۔