بلوچستان: مستونگ کے علاقے دشت کابو میں دھماکا، 3 افراد ہلاک، 6 زخمی

کوئٹہ (ڈیلی اردو) بلوچستان کے ضلع مستونگ کے علاقے دشت کابو میں بم دھماکے میں 3 افراد ہلاک اور 6 زخمی ہوگئے۔

ڈیلی اردو کو لیویز ذرائع سے ملنے والی اطلاع کے مطابق دھماکے کے نتیجے میں تین افراد ہلاک جبکہ 6 زخمی ہوئے جن کی حالت تشویشناک ہے۔

لیویز کے مطابق دھماکے میں دو گاڑیوں کو ریموٹ کنٹرول سے نشانہ بنایا گیا، دھماکا اس وقت ہوا جب قبائلی افراد میت کو دفنا نے کے بعد واپس آرہے تھے.

دھماکے کے بعد لیویز، پولیس اور ریسکیو ادارے کے رضاکار جائے وقوعہ پہنچنے اور لاشوں و زخمیوں کو کوئٹہ منتقل کیا۔

دھماکے کے فوری بعد سکیورٹی اہلکاروں نے جائے وقوعہ کو گھیرے میں لیکر سرچ آپریشن شروع کر دیا ہے۔

دوسری طرف مشیر داخلہ بلوچستان ضیاء لانگو نے مستونگ دھماکے کی شدید الفاظ میں مذمت کرتے ہوئے ڈپٹی کمشنر سے رپورٹ طلب کر لی۔