بلوچستان میں سکیورٹی فورسز کی کارروائیاں، 10 دہشت گرد ہلاک، 2 خواتین خودکش بمبار گرفتار

راولپنڈی (ڈیلی اردو) پاکستان کے شورش زدہ صوبہ بلوچستان میں سکیورٹی فورسز کی مختلف کارروائیوں کے دوران 10 دہشت گرد ہلاک جبکہ دو خواتین مبینہ خودکش بمباروں اور ایک سہولت کار کو گرفتار کرنے کا دعویٰ کیا گیا ہے۔

پاکستان فوج کے شعبۂ تعلقاتِ عامہ (آئی ایس پی آر) کے مطابق بلوچستان کے اضلاع سوراب اور مستونگ میں گزشتہ 48 گھنٹوں کے دوران انٹیلی جنس معلومات کی بنیاد پر متعدد کارروائیاں کی گئیں۔

آئی ایس پی آر کے بیان کے مطابق ضلع مستونگ میں سکیورٹی فورسز کی کارروائی کے دوران تین دہشت گرد ہلاک کیے گئے، جبکہ دو خواتین خودکش بمباروں اور ان کے ایک سہولت کار کو گرفتار کیا گیا۔

فوج کے مطابق کارروائیوں کے دوران اسلحہ، گولہ بارود اور دیسی ساختہ دھماکہ خیز مواد (آئی ای ڈی) بھی برآمد کیا گیا۔

آئی ایس پی آر کے مطابق ضلع سوراب میں سکیورٹی فورسز نے دہشت گردوں کے ٹھکانوں کو نشانہ بنایا، جس کے نتیجے میں مزید سات دہشت گرد ہلاک ہوئے۔

سرکاری ذرائع نے دعویٰ کیا ہے کہ ہلاک کیے گئے دہشت گرد کالعدم بلوچ لبریشن آرمی (بی ایل اے) سے وابستہ تھے۔

آئی ایس پی آر نے کہا کہ علاقے میں دیگر دہشت گردوں کی تلاش اور خاتمے کے لیے کلیئرنس آپریشن جاری ہیں۔

سکیورٹی فورسز کے مطابق بلوچستان میں دہشت گرد تنظیموں کے خلاف کارروائیاں جاری رہیں گی۔