بلوچستان میں سکیورٹی فورسز کے آپریشنز، آٹھ دہشت گرد ہلاک

راولپنڈی (ڈیلی اردو) پاکستانی سکیورٹی فورسز نے 25 اور 26 جون کو شورش زدہ صوبہ بلوچستان کے اضلاع خاران اور مستونگ میں دو مختلف کارروائیاں کرتے ہوئے آٹھ دہشت گردوں کو ہلاک کر دیا۔

پاکستانی فوج کے شعبہ تعلقاتِ عامہ (آئی ایس پی آر) کے مطابق 25 جون کو خفیہ اطلاعات کی بنیاد پر ضلع خاران میں سکیورٹی فورسز نے دہشت گردوں کے ایک گروہ کی موجودگی کا سراغ لگایا۔ کارروائی کے دوران انڈین حمایت یافتہ فتنہ الہندوستان سے تعلق رکھنے والے تین دہشت گرد ہلاک جبکہ متعدد زخمی ہوئے۔

آئی ایس پی آر کے مطابق 26 جون کو ضلع مستونگ میں ایک ممکنہ خودکش حملہ آور کی موجودگی کی اطلاعات پر انٹیلی جنس بنیاد پر آپریشن کیا گیا۔

بیان کے مطابق کارروائی کے دوران سکیورٹی فورسز نے دہشت گردوں کے ٹھکانے کو نشانہ بنایا اور شدید فائرنگ کے تبادلے کے بعد ایک خودکش بمبار سمیت پانچ دہشت گرد ہلاک کر دیے۔

آئی ایس پی آر کے مطابق کارروائی کے دوران دہشت گردوں کے زیرِ استعمال اسلحہ، گولہ بارود، دیسی ساختہ دھماکا خیز مواد اور موٹر سائیکلیں بھی برآمد کی گئیں۔

سکیورٹی فورسز کا کہنا ہے کہ علاقے میں مزید دہشت گردوں کی موجودگی کے امکان کو ختم کرنے کے لیے کلیئرنس آپریشن جاری ہے۔

وفاقی وزیرِ داخلہ محسن نقوی نے بلوچستان میں سکیورٹی فورسز کی کارروائیوں پر ردِعمل دیتے ہوئے کہا کہ سکیورٹی فورسز نے بروقت کارروائیاں کرکے بلوچستان میں خوارجیوں کے ناپاک عزائم کو ناکام بنایا۔