بلوچستان: نصیر آباد میں سیکورٹی فورسز کا آپریشن، بی ایل اے کے 2 دہشت گرد ہلاک

کوئٹہ (ڈیلی اردو) پاکستانی سیکیورٹی فورسز نے شورش زدہ صوبہ بلوچستان کے ضلع نصیرآباد میں کارروائی کرتے ہوئے کالعدم بلوچ لبریشن آرمی (بی ایل اے) کے دو دہشت گردوں کو ہلاک کر دیا۔

اطلاعات کے مطابق سیکیورٹی فورسز کو خفیہ اطلاع ملی تھی کہ دو مسلح موٹرسائیکل سوار نصیرآباد کے قریب آر سی ڈی ہائی وے پر موجود ہیں، جس پر کارروائی کی گئی۔

ذرائع کے مطابق ایک دہشت گرد کلورٹ پل کے قریب جبکہ دوسرے کو ایک کمپاؤنڈ کا محاصرہ کرکے ہلاک کیا گیا۔

سیکیورٹی ذرائع کا کہنا ہے کہ کارروائی کے دوران ایک ایس ایم جی، تقریباً 75 کلوگرام دھماکہ خیز مواد سے بھرے دو کنستر، دو موبائل فون اور ایک موٹرسائیکل برآمد کی گئی۔

مزید برآں ہلاک دہشت گردوں کے قبضے سے چھ میگزین، ایک ایس ٹی او ایس ڈیوائس اور بارود رکھنے والی جیکٹ بھی برآمد کی گئی۔

سیکیورٹی ذرائع کے مطابق بلوچستان سے دہشت گردی کے مکمل خاتمے کے لیے کارروائیاں جاری رہیں گی۔