بلوچستان: واشک میں دہشت گردوں کی فائرنگ، پنجاب سے تعلق رکھنے والے 5 مزدور ہلاک

کوئٹہ (نمائندہ ڈیلی اردو) پاکستان کے شورش زدہ صوبہ  بلوچستان کے ضلع واشک میں مسلح دہشت گردوں کی فائرنگ کے نتیجے میں پنجاب سے تعلق رکھنے والے پانچ مزدور ہلاک ہو گئے۔ واقعے کے بعد علاقے میں خوف و ہراس پھیل گیا جبکہ سکیورٹی فورسز نے حملہ آوروں کی تلاش کے لیے کارروائیاں شروع کر دی ہیں۔

واشک کے ڈپٹی کمشنر عبدالمجید سرپارہ کے مطابق فائرنگ کا واقعہ ضلع واشک کی تحصیل ماشکیل میں پیش آیا، جہاں نامعلوم مسلح دہشت گردوں نے ایک دکان پر اندھا دھند فائرنگ کی، جس کے نتیجے میں پنجاب سے تعلق رکھنے والے پانچ مزدور موقع پر ہلاک ہو گئے۔

ضلعی انتظامیہ کے مطابق ہلاک ہونے والے مزدوروں کا تعلق پنجاب کے مختلف اضلاع سے تھا۔ تاحال ان کی شناخت اور حملے کی وجوہات سے متعلق مزید تفصیلات جاری نہیں کی گئی ہیں۔

واقعے کے بعد پولیس اور دیگر قانون نافذ کرنے والے اداروں نے جائے وقوعہ کو گھیرے میں لے کر شواہد اکٹھے کیے، جبکہ حملہ آوروں کی گرفتاری کے لیے سرچ آپریشن شروع کر دیا گیا ہے۔

وزیراعلیٰ بلوچستان میر سرفراز بگٹی نے واقعے کی شدید مذمت کرتے ہوئے کہا کہ بے گناہ مزدوروں کا قتل ایک گھناؤنا جرم ہے۔ انہوں نے کہا کہ دہشت گردی میں ملوث ہر مجرم کو قانون کے کٹہرے میں لایا جائے گا اور ریاست کی رٹ کو چیلنج کرنے والوں کے خلاف کارروائی مزید فیصلہ کن ہوگی۔

بلوچستان حکومت کے ترجمان شاہد رند نے کہا کہ وزیراعلیٰ نے واقعے کا فوری نوٹس لیتے ہوئے شفاف اور غیر جانبدار تحقیقات کا حکم دیا ہے۔ ان کے مطابق حملے میں ملوث عناصر کو جلد قانون کی گرفت میں لایا جائے گا۔

اس حملے کی ذمہ داری کالعدم بلوچ لبریشن آرمی نے قبول کرنے کا دعوی کیا ہے جبکہ واقعے کی تحقیقات جاری ہیں۔