بلوچستان: چاغی میں بی ایل اے کے حملے، بینک اور پولیس چوکی نذرِ آتش

واشنگٹن (ش ح ط) پاکستان کے شورش زدہ صوبہ بلوچستان میں کالعدم بلوچ لبریشن آرمی (بی ایل اے) کے مسلح حملوں میں شدت کی اطلاعات سامنے آئی ہیں۔ ضلع چاغی میں مسلح افراد نے ایک بینک اور پولیس چوکی کو آگ لگا دی، جبکہ مختلف شاہراہوں کو بھی بند کرنے کی اطلاعات ہیں۔

ذرائع کے مطابق ضلع چاغی میں کالعدم بی ایل اے کے کم از کم 32 مسلح افراد نے کارروائی کرتے ہوئے مسلم کمرشل بینک اور پولیس چوکی کو نشانہ بنایا اور انہیں نذرِ آتش کر دیا۔ مسلح افراد کی جانب سے بعض شاہراہوں پر رکاوٹیں کھڑی کرنے کی بھی اطلاعات ہیں۔

ذرائع کا کہنا ہے کہ علاقے میں سکیورٹی فورسز اور کالعدم تنظیم کے مسلح افراد کے درمیان جھڑپیں جاری ہیں، جبکہ ابتدائی اطلاعات کے مطابق کارروائیوں کے دوران بی ایل اے کے کم از کم چار مبینہ حملہ آور ہلاک ہو چکے ہیں۔

دوسری جانب بلوچستان کے ضلع واشک میں سکیورٹی فورسز کے ایک قافلے کو دیسی ساختہ بم (آئی ای ڈی) کے ذریعے نشانہ بنایا گیا، جس کے نتیجے میں ایک سکیورٹی اہلکار ہلاک جبکہ متعدد دیگر زخمی ہو گئے۔

یہ واقعات ایک ایسے وقت میں پیش آئے ہیں جب گزشتہ روز بلوچستان کے ضلع لسبیلہ میں آر سی ڈی ہائی وے پر وال پٹ کے مقام پر کالعدم بلوچ لبریشن آرمی (بی ایل اے) نے پاکستانی فوج کے ایک قافلے کو بم حملے کا نشانہ بنایا تھا، جس کے نتیجے میں ایک جونیئر کمیشنڈ افسر (جے سی او) سمیت 11 سکیورٹی اہلکار ہلاک ہو گئے تھے۔

حکام کے مطابق لسبیلہ حملے کے بعد سکیورٹی فورسز نے کارروائیاں شروع کیں، جبکہ بلوچستان کے مختلف علاقوں میں دہشت گردی کے واقعات اور سکیورٹی آپریشنز جاری ہیں۔

مزید تفصیلات کا انتظار ہے۔