بلوچستان: کالعدم تنظیموں کی مبینہ سہولت کاری پر وکیل میر خان لہڑی سی ٹی ڈی کے حوالے

کوئٹہ (ڈیلی اردو) پاکستان کے شورش زدہ صوبے بلوچستان کے دارالحکومت کوئٹہ میں کالعدم تنظیموں کی مبینہ سہولت کاری کے الزام میں گرفتار وکیل میر خان ایڈووکیٹ کو انسداد دہشت گردی کی عدالت ون نے پانچ روزہ جسمانی ریمانڈ پر سی ٹی ڈی کے حوالے کر دیا ہے۔

جمعے کے روز میر خان ایڈووکیٹ کو عدالت میں پیش کیا گیا جہاں استغاثہ نے ریمانڈ کی درخواست دی۔ عدالت نے درخواست منظور کرتے ہوئے پانچ روزہ ریمانڈ کا حکم دیا۔

سرکاری حکام کا مؤقف ہے کہ میر خان ایڈووکیٹ بھی بلوچستان یونیورسٹی کے لیکچرر عثمان قاضی کی طرح کالعدم تنظیموں کے لیے سہولت کاری میں ملوث ہیں۔ تاہم یہ حکومتی مؤقف ہے، اور اس کی آزادانہ تصدیق تاحال ممکن نہیں ہو سکی ہے۔

پس منظر اور گرفتاری کا معاملہ

انسانی حقوق کے کارکن اور وکیل عمران بلوچ ایڈووکیٹ کے مطابق میر خان کو 12 اگست کو متعدد افراد کے ہمراہ کوئٹہ کے علاقے سریاب لوہڑ کاریز سے گرفتار کیا گیا، تاہم انہیں 10 روز بعد عدالت میں پیش کیا گیا جو کہ قانون کی خلاف ورزی ہے۔

عمران بلوچ نے دعویٰ کیا کہ میر خان اس وقت اپنی مدد آپ کے تحت قائم لائبریری میں پبلک سروس کمیشن کے امتحانات کی تیاری کر رہے تھے۔ ان کے مطابق سادہ کپڑوں میں ملبوس اہلکار ایک دکاندار کو گرفتار کرنے آئے تھے، مگر مزاحمت کے بعد بڑی تعداد میں سکیورٹی اہلکار پہنچے اور متعدد افراد کو گرفتار کرلیا، جن میں میر خان بھی شامل تھے۔

میر خان ایڈووکیٹ کا پس منظر

میر خان ایڈووکیٹ کا تعلق بلوچستان کے ضلع نصیرآباد سے ہے اور وہ بلوچ قبیلے لہڑی سے تعلق رکھتے ہیں۔ انہوں نے اسلام آباد کی اسلامی یونیورسٹی سے قانون کی ڈگری حاصل کی۔

ان کے قریبی حلقوں کے مطابق وہ وکالت کو پیشہ ورانہ طور پر اختیار کرنے کے بجائے پبلک سروس کمیشن کے امتحانات پر توجہ دے رہے تھے۔ انہوں نے اسسٹنٹ ڈسٹرکٹ پبلک پراسیکیوٹر کی پوسٹ کا امتحان پاس کرلیا تھا اور ان کی تعیناتی 14 اگست کے بعد متوقع تھی، جبکہ تحصیلدار کے عہدے کے لیے بھی امتحان پاس کر چکے تھے اور زبانی امتحان کی تیاری کر رہے تھے۔

اہل خانہ کا مؤقف

میر خان کے اہل خانہ سے رابطہ نہیں ہو سکا ہے جبکہ سرکاری حکام کی جانب سے لگائے گئے الزامات پر ان کی جانب سے کوئی وضاحت سامنے نہیں آئی ہے۔