بلوچستان: کوئٹہ میں سکیورٹی فورسز کے آپریشنز، 9 دہشت گرد اور سی ٹی ڈی کے 4 اہلکار ہلاک

کوئٹہ (ڈیلی اردو) پاکستان کے شورش زدہ صوبہ بلوچستان میں سرکاری حکام کے مطابق ضلع کوئٹہ میں جھڑپوں کے دوران نو دہشت گرد ہلاک جبکہ کاؤنٹر ٹیررازم ڈیپارٹمنٹ (سی ٹی ڈی) کے چار اہلکار مارے گئے ہیں۔

وزیراعلیٰ بلوچستان میر سرفراز بگٹی نے اس کارروائی کو سراہتے ہوئے سی ٹی ڈی اور دیگر قانون نافذ کرنے والے اداروں کی کارکردگی کی تعریف کی ہے۔

محکمہ داخلہ بلوچستان کے معاون برائے میڈیا بابر یوسفزئی کے مطابق سی ٹی ڈی نے خفیہ اطلاعات کی بنیاد پر ضلع کوئٹہ کے علاقوں نوحصار اور پنجپائی میں کارروائیاں کیں۔ ان کارروائیوں کے دوران نو دہشت گرد ہلاک ہوئے، جبکہ فائرنگ کے تبادلے میں سی ٹی ڈی کے 4 اہلکار ہلاک اور 6 زخمی ہو گئے۔

انہوں نے کہا کہ دہشت گرد عناصر کے خلاف کارروائیاں جاری رہیں گی اور کسی کو بھی بلوچستان میں امن خراب کرنے کی اجازت نہیں دی جائے گی۔

وزیراعلیٰ بلوچستان نے ایک بیان میں کہا کہ بروقت اور مؤثر کارروائی کے نتیجے میں نو دہشت گردوں کا ہلاک ہونا سکیورٹی فورسز کی پیشہ ورانہ صلاحیتوں کا واضح ثبوت ہے۔

انہوں نے مزید کہا کہ بلوچستان کے امن کو سبوتاژ نہیں ہونے دیا جائے گا اور ریاست پوری قوت کے ساتھ دشمن عناصر کے خلاف کارروائیاں جاری رکھے گی۔ وزیراعلیٰ نے سی ٹی ڈی کے چار اہلکاروں کی ہلاکت پر گہرے رنج و غم کا اظہار بھی کیا۔

دوسری جانب کوئٹہ سے ملنے والی اطلاعات کے مطابق ہفتے کے روز سکیورٹی فورسز کی ایک گاڑی کو بارودی سرنگ سے نشانہ بنایا گیا، جس کے نتیجے میں اہلکار ہلاک ہونے کی اطلاعات ہیں۔

کوئٹہ-تفتان شاہراہ پر مسلح افراد نے پانچ بڑی گاڑیوں کو نذرِ آتش کر دیا، جس سے علاقے میں خوف و ہراس پھیل گیا۔

خاران کے علاقے گروک میں بھی سکیورٹی فورسز کی ایک گاڑی کو دھماکے میں نشانہ بنایا گیا، جبکہ اس حملے میں بھی جانی نقصان کی اطلاعات موصول ہوئی ہیں۔

ڈیرہ بگٹی میں مسلح افراد نے 26 انچ قطر کی گیس پائپ لائن کو دھماکہ خیز مواد سے اڑا دیا، جبکہ سوئی سے سندھ جانے والی گیس پائپ لائن کو کشمور کے مقام پر بھی دھماکے سے تباہ کر دیا گیا، جس کے باعث گیس ترسیل متاثر ہونے کا خدشہ ہے۔

اطلاعات کے مطابق ایک پولیس چیک پوسٹ پر دستی بم حملہ بھی کیا گیا، جبکہ لنجو صفاری کے علاقے میں ڈیتھ اسکواڈ اور مسلح افراد کے درمیان جھڑپوں کی بھی اطلاعات ہیں۔

حکام کی جانب سے بیشتر واقعات پر تاحال باضابطہ تفصیلات جاری نہیں کی گئیں، تاہم مختلف علاقوں میں سکیورٹی سخت کر دی گئی ہے۔