بلوچستان: کوئٹہ میں سی ٹی ڈی کارروائی، 4 مبینہ عسکریت پسند ہلاک

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے صوبائی حکومت کوئٹہ کے علاقے سریاب میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع کی بنیاد پر کارروائی کرتے ہوئے چار مبینہ عسکریت پسندوں کو ہلاک کر دیا۔

ترجمان سی ٹی ڈی کے مطابق کارروائی ہفتے کی شب ایک ایسے کمپاؤنڈ میں کی گئی جو کالعدم تنظیم سے وابستہ افراد کے زیر استعمال تھا۔ جیسے ہی سی ٹی ڈی اہلکاروں نے کمپاؤنڈ پر پیش قدمی کی، اندر موجود مسلح افراد نے فائرنگ شروع کر دی، جس پر دونوں جانب سے شدید فائرنگ کا تبادلہ ہوا۔

فائرنگ کے نتیجے میں چاروں مبینہ عسکریت پسند موقع پر ہی ہلاک ہو گئے، جبکہ کسی بھی سی ٹی ڈی اہلکار کے جانی نقصان کی اطلاع نہیں ملی۔

ترجمان نے بتایا کہ کارروائی کے بعد کمپاؤنڈ کی مکمل تلاشی لی گئی، جس دوران خودکار ہتھیار، دستی بم اور کالعدم تنظیم سے متعلق لٹریچر برآمد ہوا۔

سی ٹی ڈی حکام کے مطابق علاقے کو گھیرے میں لے کر کلیئرنس آپریشن جاری ہے، جبکہ فرانزک اور انٹیلی جنس شواہد اکٹھے کیے جا رہے ہیں۔ ہلاک ہونے والے مبینہ عسکریت پسندوں کی شناخت اور ان کے ممکنہ نیٹ ورک سے روابط جاننے کے لیے مزید تحقیقات جاری ہیں۔

واقعے کے بعد ضلع بھر میں سکیورٹی ہائی الرٹ کر دی گئی ہے۔