بلوچستان: کوئٹہ میں شعبان چیک پوسٹ پر حملہ، دو پولیس اہلکار ہلاک

کوئٹہ (نمائندہ ڈیلی اردو) صوبہ بلوچستان کے صوبائی حکومت کوئٹہ کے نواحی علاقے شعبان میں پولیس چیک پوسٹ پر فائرنگ کے نتیجے میں دو اہلکار ہلاک اور ایک زخمی ہوگیا ہے۔

پولیس حکام کے مطابق کوئٹہ کے نواح میں واقع تفریحی مقام شعبان میں چیک پوسٹ پر حملہ آوروں نے فائرنگ کی، شدید فائرنگ کے تبادلے میں دو اہلکار ہلاک ہوگئے

حکام کا مزید کہنا ہے کہ فائرنگ کے نتیجے میں ایک پولیس اہلکار شدید زخمی بھی ہوا ہے۔

ہلاک ہونے والے اہلکاروں کی شناخت سپاہی محمد رمضان اور سپاہی شمس ال اسلام کے نام سے ہوئی ہے جبکہ زخمی اہلکار کی شناخت آصف رضا کے نام سے ہوئی ہے۔

واقعے کے بعد زخمی اور لاشوں کو ہسپتال منتقل کیا گیا جبکہ پولیس اور فورسز کی بھاری نفری نے موقع پر پہنچ کر علاقے کو گھیرے میں لے لیا۔

ڈی آئی جی کوئٹہ کے مطابق شعبان میں پولیس پر حملے کے بعد پولیس کی جوابی کارروائی میں چار دہشت گرد مارے گئے اور باقی دہشت گردوں کی گرفتاری کے لیے سرچ آپریشن شروع کر دیا گیا۔