بلوچستان: کوئٹہ میں طالبان اور اوڑک قبائل میں جھڑپ، 4 افراد ہلاک، متعدد زخمی

واشنگٹن (ش ح ط) پاکستان کے شورش زدہ صوبہ بلوچستان کے دارالحکومت کوئٹہ کے نواحی علاقے ہنہ اوڑک میں کالعدم تحریک طالبان پاکستان (ٹی ٹی پی) کے ایک دھڑے سے منسلک مبینہ مسلح افراد اور مقامی اوڑک قبائل کے درمیان جھڑپ میں چار افراد ہلاک جبکہ ایک درجن سے زائد افراد زخمی ہو گئے، جن میں سے کئی کی حالت تشویشناک بتائی جا رہی ہے۔

اتوار کے روز ہنہ اوڑک میں ایک مرتبہ پھر مسلح افراد اور مقامی رہائشیوں کے درمیان فائرنگ کا تبادلہ ہوا، جس کے نتیجے میں چار مقامی افراد ہلاک اور متعدد زخمی ہو گئے۔ فائرنگ کے بعد علاقے میں کشیدگی پھیل گئی، جس پر فرنٹیئر کور (ایف سی) بلوچستان اور انسدادِ دہشت گردی فورس (اے ٹی ایف) کی بھاری نفری موقع پر پہنچ گئی اور علاقے میں کارروائی شروع کر دی۔

مقامی اور سرکاری ذرائع کے مطابق زخمیوں اور ہلاک ہونے والوں کی لاشوں کو ٹراما سینٹر کوئٹہ منتقل کر دیا گیا ہے، جہاں زخمیوں کو طبی امداد فراہم کی جا رہی ہے۔

واقعے کے خلاف اوڑک قبائل کے افراد نے احتجاج کرتے ہوئے ہنہ اوڑک میں ٹائر نذرِ آتش کر کے سڑک ہر قسم کی آمد و رفت کے لیے بند کر دی۔ بعد ازاں مظاہرین نے ہلاک ہونے والوں کی لاشیں احتجاجاً کوئٹہ ایئرپورٹ جانے والی مرکزی شاہراہ پر رکھ دیں، جس کے باعث ٹریفک کا نظام درہم برہم ہو گیا۔

مظاہرین نے مطالبہ کیا کہ حکومت اور قانون نافذ کرنے والے ادارے حملے میں ملوث مسلح دہشت گردوں کے خلاف فوری کارروائی کریں اور علاقے کے مکینوں کو مؤثر تحفظ فراہم کریں۔

سکیورٹی فورسز کی جانب سے علاقے میں سرچ اور کلیئرنس آپریشن جاری ہے، جبکہ واقعے کے حوالے سے مزید تحقیقات بھی کی جا رہی ہیں۔