بلوچستان: کیچ میں مشتبہ ڈرون گرانے کے بعد کارروائی، ڈرون آپریٹر سمیت 2 دہشتگرد ہلاک

کیچ (ڈیلی اردو) پاکستان کے صوبہ بلوچستان کے ضلع کیچ کے علاقے کردگاپ میں سکیورٹی فورسز نے مشتبہ ڈرون سرگرمی ناکام بناتے ہوئے ایک کواڈ کاپٹر ڈرون کو جام کرکے گرا دیا، جس کے بعد کی گئی کارروائی میں ڈرون آپریٹر سمیت 2 دہشتگرد ہلاک ہوگئے۔

ابتدائی اطلاعات کے مطابق سکیورٹی فورسز نے علاقے میں پرواز کرنے والے مشتبہ ڈرون کی نشاندہی کے بعد اسے جدید تکنیکی نظام کے ذریعے جام کیا اور زمین پر گرا دیا۔ واقعے کے بعد فورسز نے علاقے کو گھیرے میں لے کر کلیئرنس آپریشن شروع کیا تاکہ ڈرون چلانے والے افراد اور اس سرگرمی میں ملوث دیگر عناصر کا سراغ لگایا جا سکے۔

رپورٹ کے مطابق بعد ازاں کارروائی کے دوران ڈرون آپریٹر اور اس کے ایک ساتھی کو ہلاک کر دیا گیا۔ دونوں کا تعلق مبینہ طور پر کالعدم بلوچ لبریشن آرمی (بی ایل اے) سے بتایا گیا ہے، تاہم ان کی شناخت اور ڈرون کے ممکنہ استعمال سے متعلق مزید تفصیلات سامنے نہیں آئیں۔

بلوچستان میں سکیورٹی فورسز کے خلاف کارروائیوں میں ڈرون ٹیکنالوجی کے ممکنہ استعمال نے سکیورٹی اداروں کے لیے نئے چیلنجز پیدا کیے ہیں۔ ڈرون نگرانی، معلومات جمع کرنے اور حملوں کے لیے استعمال کیے جا سکتے ہیں، اسی لیے سکیورٹی ادارے مشتبہ بغیر پائلٹ فضائی سرگرمیوں کی روک تھام کے لیے نگرانی اور تکنیکی اقدامات پر توجہ دے رہے ہیں۔

واضح رہے کہ بلوچستان میں کالعدم بلوچ لبریشن آرمی سمیت مختلف مسلح علیحدگی پسند گروہ سکیورٹی فورسز اور سرکاری تنصیبات کو نشانہ بناتے رہے ہیں۔ سکیورٹی اداروں کی جانب سے صوبے کے مختلف اضلاع میں انٹیلی جنس بنیادوں پر کارروائیاں بھی جاری ہیں۔