بنوں : پولیس چوکی پر دہشتگردوں کا حملہ ناکام، جوابی کارروائی میں 4 حملہ آور ہلاک

بنوں (ڈیلی اردو) پاکستان کے صوبہ خیبرپختونخوا کے ضلع بنوں میں مسلح دہشتگردوں نے نصف شب کنگر پل پولیس چوکی پر حملے کی کوشش کی، تاہم پولیس کی بروقت جوابی کارروائی کے نتیجے میں حملہ ناکام بنا دیا گیا۔ پولیس کے مطابق سرچ آپریشن کے دوران 4 حملہ آوروں کی لاشیں برآمد ہوئیں۔

پولیس کے ترجمان کے مطابق حملے کی اطلاع ملتے ہی کوئیک رسپانس فورس (کیو آر ایف)، ریپڈ رسپانس فورس (آر آر ایف) اور پولیس لائنز سے اضافی نفری جائے وقوعہ پر پہنچ گئی۔ پولیس اہلکاروں نے علاقے کو گھیرے میں لے کر سرچ اور کلیئرنس آپریشن شروع کیا، جس کے دوران چار حملہ آوروں کی لاشیں برآمد ہوئیں۔

پولیس نے جائے وقوعہ سے چار کلاشنکوفیں، متعدد میگزین، بھاری مقدار میں گولہ بارود، دستی بم اور کارتوس رکھنے والی پیٹیاں بھی قبضے میں لینے کا دعویٰ کیا ہے۔ حکام کے مطابق ہلاک ہونے والے افراد کی شناخت کا عمل جاری ہے۔

دوسری جانب انسپکٹر جنرل پولیس خیبرپختونخوا ذوالفقار حمید نے حملہ ناکام بنانے پر بنوں پولیس کی کارکردگی کو سراہتے ہوئے کہا کہ رات کی تاریکی میں حملہ آوروں کا مقابلہ کرکے انہیں پسپا کرنا پولیس اہلکاروں کی پیشہ ورانہ تربیت، مستعدی اور بہادری کا ثبوت ہے۔ وفاقی وزیر داخلہ محسن نقوی نے بھی پولیس اور محکمہ انسداد دہشتگردی کے اہلکاروں کی کارروائی کو سراہا۔

واضح رہے کہ بنوں سمیت خیبرپختونخوا کے مختلف اضلاع میں پولیس اور سکیورٹی اداروں کو مسلسل دہشتگرد حملوں کا سامنا ہے۔ ذرائع کے مطابق 12 نومبر کو ڈیرہ اسماعیل خان کے تھانہ بندکورائی پر بارود سے بھری گاڑی کے ذریعے حملے کی کوشش کی گئی تھی، تاہم پولیس کی جوابی کارروائی کے باعث حملہ آور تھانے میں داخل ہونے میں ناکام رہے تھے۔ اسی روز صوابی میں گشت پر مامور پولیس اہلکاروں پر فائرنگ سے دو اہلکار ہلاک ہوئے تھے۔