بلوچستان : سرکاری تنصیبات پر حملے کی کوشش، فورسز کی کارروائی، مسلح افراد فرار

واشک(ڈیلی اردو) بلوچستان کے شورش زدہ ضلع واشک کی تحصیل ماشکیل میں مسلح افراد کی جانب سے پولیس اور دیگر سرکاری تنصیبات کو نشانہ بنانے کی کوشش سکیورٹی فورسز کی بروقت کارروائی کے باعث ناکام ہوگئی۔

اسسٹنٹ کمشنر ماشکیل کے مطابق مسلح افراد نے پولیس، کسٹمز ویئر ہاؤس سمیت مختلف سرکاری تنصیبات پر حملے کی کوشش کی، تاہم اطلاع ملتے ہی ایف سی بلوچستان کے اہلکاروں نے موقع پر پہنچ کر جوابی کارروائی شروع کردی۔

سکیورٹی فورسز کی فائرنگ کے بعد حملہ آور علاقے سے فرار ہوگئے۔ حکام کے مطابق فرار ہونے والے افراد اپنی گاڑیاں، موٹر سائیکلیں اور بڑی مقدار میں گولہ بارود موقع پر چھوڑ گئے، جنہیں سکیورٹی فورسز نے قبضے میں لے لیا۔

حکام کا کہنا ہے کہ بروقت کارروائی کے نتیجے میں سرکاری تنصیبات کو بڑے نقصان سے محفوظ رکھا گیا، جبکہ فرار ہونے والے مسلح افراد کی تلاش کے لیے کارروائی جاری ہے۔