بنوں: دہشت گردوں نے گیس پائپ لائن دھماکے سے اڑا دی، پشاور میں دھماکا

پشاور (نمائندگان ڈیلی اردو)پاکستان کے شورش زدہ صوبہ خیبر پختونخوا کے شہر بنوں میں دہشت گردوں نے گیس پائپ لائن کو دھماکا خیز مواد سے اڑا دیا، جس کے نتیجے میں پنجاب کے مختلف شہروں کو گیس کی سپلائی معطل ہو گئی۔

پولیس کے مطابق واقعہ گزشتہ رات میریان کے علاقے میں پیش آیا جہاں دہشت گردوں نے گیس پائپ لائن کو نشانہ بنایا۔ دھماکے کے بعد علاقے میں سکیورٹی بڑھا دی گئی جبکہ متعلقہ اداروں نے متاثرہ پائپ لائن کی مرمت کا کام بھی شروع کر دیا ہے۔

دوسری جانب خیبر پختونخوا کے دارالحکومت پشاور میں کوہاٹ روڈ پر بھی بارودی مواد کا دھماکا ہوا۔

پولیس کے مطابق پشاور دھماکے میں کسی جانی یا مالی نقصان کی اطلاع نہیں ملی، تاہم پولیس اور بم ڈسپوزل یونٹ کی ٹیمیں موقع پر پہنچ گئیں اور شواہد اکٹھے کرنے کے بعد تحقیقات کا آغاز کر دیا گیا ہے۔

حکام کا کہنا ہے کہ دونوں واقعات کے مختلف پہلوؤں سے تحقیقات جاری ہیں جبکہ حملوں میں ملوث دہشت گردوں کی تلاش بھی شروع کر دی گئی ہے۔