بنوں: عسکریت پسندوں نے پولیس اہلکار کو اغوا کر لیا، گھر کو آگ لگا دی

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں میں سی ٹی ڈی پولیس اہلکار قدیر کو مسلح عسکریت پسندوں نے اغوا کر لیا ہے۔

نمائندہ ڈیلی اردو کے مطابق واقعہ ڈوگر عمر زئی کے علاقے میں پیش آیا، جہاں مسلح افراد نے پہلے قدیر کے گھر کو آگ لگا دی، جس کے نتیجے میں گھر کے تین کمرے اور اندر موجود ساز و سامان مکمل طور پر جل گئے۔ تقریباً 40 سے 50 مسلح عسکریت پسندوں نے گھر میں داخل ہو کر یہ کارروائی کی۔

پولیس کانسٹیبل قدیر ولد نور زادہ ڈوگر عمر زئی کا رہائشی تھا اور سی پیک پولیس چوکی پر تعینات تھا۔

کالعدم تنظیم تحریک طالبان پاکستان کے "گیدڑ گروپ ڈومیل" نے پولیس کانسٹیبل قدیر کی اغوا کی ذمہ داری قبول کر لی ہے۔ 

اغوا کے بعد اسے ڈومیل کے علاقے اکبر علی خان کلے کے جنگل میں منتقل کیا گیا، جبکہ مسلح افراد نے سوشل میڈیا پر اس واقعے کی اطلاع بھی پوسٹ کی۔

پولیس نے فوری کارروائی کا عندیہ دیتے ہوئے کہا ہے کہ مغوی کو بازیاب کرانے کے لیے سرچ آپریشن جاری ہے۔