بنوں :فورسز کی گاڑی پر خودکش حملہ، 2 اہلکار زخمی، یونیورسٹی کے قریب بارودی مواد برآمد

بنوں(ڈیلی اردو) خیبرپختونخواہ کے شورش زدہ ضلع بنوں کے علاقے مالی خیل میں ایک نجی اسکول کے قریب سیکیورٹی فورسز کی ایم آر اے پی گاڑی کو خودکش حملے کا نشانہ بنایا گیا، جس کے نتیجے میں 2 اہلکار زخمی ہوگئے۔

مقامی ذرائع کے مطابق خودکش حملہ آور زرنج رکشے میں سوار تھا اور اس نے سیکیورٹی فورسز کی گاڑی کو نشانہ بنایا۔ حملے کے بعد سیکیورٹی اہلکاروں نے کارروائی کرتے ہوئے حملہ آور کو ہلاک کردیا۔

ذرائع کے مطابق واقعے میں 2 خودکش حملہ آور ہلاک ہوئے ہیں۔ حملے کے بعد علاقے کو گھیرے میں لے کر سیکیورٹی اقدامات مزید سخت کردیئے گئے۔

حملے میں سپاہی ذیشان اور سپاہی خیرالدین زخمی ہوئے، جنہیں طبی امداد کے لیے سی ایم ایچ بنوں منتقل کردیا گیا۔

دوسری جانب بنوں ٹاؤن شپ میں یونیورسٹی آف سائنس اینڈ ٹیکنالوجی کے قریب مشکوک بارودی مواد کی اطلاع پر پولیس نے علاقے کو گھیرے میں لے لیا۔ بم ڈسپوزل یونٹ نے موقع پر پہنچ کر بارودی مواد کو محفوظ طریقے سے تلف کردیا۔

پولیس کے مطابق واقعے سے متعلق مزید قانونی کارروائی اور تحقیقات جاری ہیں۔