بنوں میں تھانہ میریان پر خودکش حملے کی کوشش ناکام، 4 حملہ آور ہلاک

بنوں (نمائندہ ڈیلی اردو) پاکستان کے شورش زدہ صوبہ خیبرپختونخوا کے ضلع بنوں میں واقع تھانہ میریان پر خودکش حملے کی بڑی کوشش پولیس اور سکیورٹی اہلکاروں نے بروقت کارروائی کرتے ہوئے ناکام بنا دی۔ حکام کے مطابق بارود سے بھری گاڑی کو تھانے تک پہنچنے سے پہلے ہی نشانہ بنا کر تباہ کر دیا گیا، جبکہ بعد ازاں ہونے والے مقابلے میں چار حملہ آور ہلاک ہو گئے۔

ابتدائی اطلاعات کے مطابق حملہ آور بارود سے بھری گاڑی کے ذریعے تھانے کو نشانہ بنانا چاہتے تھے، تاہم پولیس اور سکیورٹی اہلکاروں نے مشتبہ گاڑی کی بروقت نشاندہی کرتے ہوئے اس پر فائرنگ کی، جس کے نتیجے میں گاڑی ہدف تک پہنچنے سے پہلے ہی دھماکے سے تباہ ہو گئی۔

حکام کا کہنا ہے کہ دھماکے کے فوراً بعد متعدد حملہ آوروں نے تھانے میں داخل ہونے کی کوشش کی، تاہم پولیس نے فوری جوابی کارروائی کرتے ہوئے انہیں روک دیا۔ فائرنگ کے تبادلے میں چار حملہ آور ہلاک ہو گئے، جبکہ تھانے پر قبضے کی کوشش مکمل طور پر ناکام بنا دی گئی۔

واقعے کے بعد پولیس، سکیورٹی فورسز اور دیگر قانون نافذ کرنے والے اداروں کی بھاری نفری موقع پر پہنچ گئی۔ علاقے کو گھیرے میں لے کر سرچ اور کلیئرنس آپریشن شروع کر دیا گیا تاکہ کسی بھی ممکنہ خطرے کو ختم کیا جا سکے اور حملہ آوروں کے دیگر ساتھیوں کی موجودگی کا جائزہ لیا جا سکے۔

حکام کے مطابق واقعے کی تحقیقات جاری ہیں۔ حملہ آوروں کی شناخت، ان کی تنظیمی وابستگی اور حملے کی منصوبہ بندی سے متعلق شواہد اکٹھے کیے جا رہے ہیں، جبکہ جانی و مالی نقصانات اور دیگر تفصیلات سرکاری تحقیقات مکمل ہونے کے بعد جاری کی جائیں گی۔