بنوں میں دہشت گردوں نے گرلز اسکول کو بم سے اڑا دیا

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں میں نامعلوم مسلح دہشت گردوں نے گورنمنٹ گرلز اسکول کو بارودی مواد سے نشانہ بنایا، جس کے نتیجے میں اسکول کی بیرونی دیوار کو نقصان پہنچا۔

پولیس کے مطابق یہ واقعہ بنوں کے علاقے خیراکی میں پیش آیا، جہاں نامعلوم مسلح دہشت گردوں نے گورنمنٹ گرلز اسکول کی بیرونی دیوار کے ساتھ بارودی مواد نصب کر رکھا تھا، جو دھماکے سے پھٹ گیا۔ دھماکے کے نتیجے میں اسکول کی بیرونی دیوار گر گئی، تاہم کوئی جانی نقصان نہیں ہوا۔

پولیس کا کہنا ہے کہ اسکول میں 80 سے زائد طالبات زیرِ تعلیم ہیں، تاہم موسمِ گرما کی تعطیلات کے باعث واقعے کے وقت عمارت خالی تھی۔

واقعے کے بعد پولیس اور دیگر سکیورٹی اداروں نے علاقے کو گھیرے میں لے کر شواہد اکٹھے کرنا شروع کر دیے، جبکہ نامعلوم مسلح دہشت گردوں کی تلاش کے لیے سرچ آپریشن بھی جاری ہے۔

پولیس کے مطابق دھماکے کے بعد علاقے میں سکیورٹی مزید سخت کر دی گئی ہے اور واقعے کی مختلف پہلوؤں سے تحقیقات جاری ہیں۔