بنوں میں زیر حراست عسکریت پسندوں نے سی ٹی ڈی ہیڈ کوارٹرز پر قبضہ کرلیا، کئی اہلکار یرغمال

بنوں (ڈیلی اردو/بی بی سی/انڈپینڈنٹ اردو) صوبہ خیبر پختونخوا کے ضلع بنوں میں کینٹ میں واقع محکمہ انسدادِ دہشتگردی (سی ٹی ڈی) کے دفتر میں زیر حراست شدت پسندوں اور سکیورٹی اہلکاروں میں جھڑپ ہوئی ہے۔

اتوار کو عسکریت پسندوں اور سکیورٹی اہلکاروں میں فائرنگ کے تبادلے میں سکیورٹی اہلکار کے زخمی ہونے اور عسکریت پسندوں کی جانب سے یرغمال بنائے جانے کی اطلاعات ہیں۔

سرکاری ذرائع نے اس بات کی تصدیق کی ہے بنّوں میں شدت پسندوں اور سکیورٹی اہلکاروں کے درمیان جھڑپ ہوئی ہے تاہم اُنھوں نے اس حوالے سے مزید تفصیلات فراہم نہیں کیں۔

بنوں پولیس کے سینیئر پولیس اہلکار نے انڈپینڈنٹ اردو کو بتایا کہ یہ انسداد دہشت گردی کی دفتر کے اندر سیف ہاؤس ہے جہاں پر 25 کے قریب شدت پسندوں کو تفتیش کی غرض سے رکھا گیا تھا۔

اہلکار نے بتایا کہ اسی سیف ہاؤس کے اندر ان شدت پسندوں کے دفتر کے اندر موجود پولیس اہلکاروں سے اسلحہ چھین کر ان کو یرغمال بنایا اور فائرنگ بھی کی ہے۔

اہلکار کے مطابق فائرنگ کے نتیجے میں تین سکیورٹی اہلکار زخمی ہوئے ہیں جن کو ہسپتال منتقل کیا گیا ہے۔

اہلکار نے بتایا کہ کینٹ کو مکمل طور پر سیل کیا گیا ہے اور جائے واقعہ پر پولیس سمیت دیگر قانون نافذ کرنے والے اداروں کے اہلکار بھی پہنچ گئے ہیں۔

انڈپینڈنٹ اردو کو اس سے قبل ایک اعلی پولیس افسر نے بتایا تھا کہ شدت پسندوں اور پولیس کے درمیان فائرنگ کا تبادلہ جاری ہے۔

پولیس ذرائع کے مطابق شدت پسندوں نے حملے کے بعد انسداد دہشت گردی کے دفتر پر قبضہ کر لیا ہے۔

شدت پسندوں اور پولیس کے درمیان فائرنگ کے تبادلے میں ہلاکتوں کا خدشہ ظاہر کیا جا رہا ہے۔

ذرائع نے یہ بھی بتایا کہ اس وقت ان شدت پسندوں کے خلاف کارروائی جاری ہے۔

اطلاعات ہیں کہ سکیورٹی اہلکاروں کو یرغمال بنانے والے عسکریت پسندوں نے افغانستان جانے کے لیے محفوظ راستے کا مطالبہ کیا ہے۔

https://twitter.com/ShabbirTuri/status/1604482095719403520?t=oEwnIC03G9STltJBcwLI-A&s=19

مقامی ذرائع ابلاغ نے بھی ایسی اطلاعات کے بارے میں خبر دی ہے، جبکہ سوشل میڈیا پر بھی اس حوالے سے چند تصاویر اور ویڈیو گردش کر رہی ہیں۔ ‎

بنوں پولیس کے ایک اعلیٰ افسر نے بی بی سی کو نام ظاہر نہ کرنے کی شرط پر بتایا ہے کہ آج شام کو پولیس کو اطلاع دی گئی کہ فی الفور اور ہنگامی بنیادوں پر بنوں کینٹ کے اندر پاکستان فوج ایک آپریشن کر رہی ہے جس کے لیے کینٹ کے علاقے کی مکمل ناکہ بندی کرنی ہے، جس کے بعد پولیس کی بھاری نفری کو کینٹ کے تمام داخلی راستوں پر تعنیات کر دیا گیا ہے۔