بنوں میں سیکورٹی کا آپریشن، ایک دہشت گرد ہلاک، 8 مشتبہ افراد گرفتار

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں میں پولیس، محکمہ انسداد دہشت گردی (سی ٹی ڈی) اور پاک فوج نے مشترکہ انٹیلی جنس بیسڈ آپریشن کے دوران ایک مبینہ دہشت گرد کو ہلاک جبکہ آٹھ مشتبہ افراد کو گرفتار کرنے کا دعویٰ کیا ہے۔

پولیس کے مطابق یہ کارروائی بنوں کے علاقے گاؤں گریڈہ شاہ جہاں میں ڈسٹرکٹ پولیس آفیسر (ڈی پی او) بنوں کیپٹن (ر) محمد فرقان بلال کی نگرانی میں کی گئی، جس میں ڈسٹرکٹ پولیس، ایلیٹ فورس، سی ٹی ڈی اور پاک فوج کے اہلکاروں نے حصہ لیا۔

حکام کے مطابق آپریشن سے قبل علاقے کی مکمل نگرانی اور انٹیلی جنس معلومات کی بنیاد پر کارروائی کی گئی۔ آپریشن کے دوران پاک فوج نے علاقے کا محاصرہ کرتے ہوئے اہم مقامات پر بلاکنگ پوزیشنز قائم کیں تاکہ ممکنہ فرار کے راستوں کو بند کیا جا سکے۔

پولیس کا کہنا ہے کہ کارروائی کے دوران ایک مبینہ دہشت گرد ہلاک ہوا، جس کی شناخت فوری طور پر ظاہر نہیں کی گئی۔ حکام کے مطابق ہلاک ہونے والے مبینہ دہشت گرد کے قبضے سے ایک کلاشنکوف، متعدد میگزین اور ایک بینڈولیئر برآمد کیا گیا۔

بیان کے مطابق آپریشن کے دوران مزید آٹھ مشتبہ افراد کو حراست میں لیا گیا، جنہیں ابتدائی تفتیش اور مزید تحقیقات کے لیے سی ٹی ڈی اور ڈسٹرکٹ پولیس کے حوالے کر دیا گیا ہے۔

پولیس کے مطابق تلاشی کے دوران مطلوب مبینہ دہشت گرد کمانڈر زرگل عرف انکل کے گھر سے دو ہونڈا سی ڈی 125 موٹر سائیکلیں اور ایک رکشہ بھی برآمد کیا گیا۔

حکام کا کہنا ہے کہ گرفتار افراد سے مشترکہ تکنیکی تفتیش کی جا رہی ہے تاکہ ان کے ممکنہ روابط، سہولت کاری اور دیگر سرگرمیوں سے متعلق معلومات حاصل کی جا سکیں۔

بنوں پولیس نے کہا ہے کہ ضلع میں امن و امان کے قیام، دہشت گردی کے خاتمے اور عوام کے جان و مال کے تحفظ کے لیے قانون نافذ کرنے والے اداروں کی مشترکہ کارروائیاں جاری رہیں گی۔

واضح رہے کہ خیبر پختونخوا کے جنوبی اضلاع، خصوصاً بنوں، شمالی وزیرستان اور ملحقہ علاقوں میں گزشتہ کچھ عرصے سے عسکریت پسندوں کے خلاف سکیورٹی فورسز کی کارروائیاں جاری ہیں۔