بنوں میں صوبائی وزیر کے اسکواڈ کی گاڑی پر بم حملہ، 3 راہگیر زخمی

بنوں (ڈیلی اردو) صوبہ خیبرپختونخوا کے ضلع بنوں میں صوبائی وزیر برائے پبلک ہیلتھ انجینئرنگ کے اسکواڈ کی گاڑی پر بم حملہ کیا گیا ہے۔

پولیس کے مطابق صوبائی وزیر برائے پبلک ہیلتھ انجینئرنگ پختون یار خان کے اسکواڈ کی گاڑی کو ریموٹ کنٹرول بم سے نشانہ بنایا گیا۔ حملے میں پولیس اہلکار محفوظ رہے۔ تاہم واقعہ میں پولیس گاڑی کو معمولی نقصان پہنچا اور تین راہگیر زخمی ہو گئے۔

پولیس وین پولیس لائن سے ملک پختون یار خان کو لینے جارہی تھی کہ ڈی آئی خان روڈ پر نشانہ بنایا گیا۔ صوبائی وزیر 9 مئی کیس کے حوالے سے انسداد دہشت گردی عدالت جارہے تھے۔ انہوں نے اس واقعے میں تین شہریوں کے زخمی ہونے پر افسوس کا اظہار کیا ہے۔